ఎన్టీయార్ అంటే మీకున్న గౌరవం అంతేనా..?

Posted: 11/22/2014 04:29 PM IST

శంషాబాద్లోని అంతర్జాతీయ విమానాశ్రయంలో దేశీయ టెర్మినల్కు ఎన్టీఆర్ పేరు పెట్టడం ఆయన స్థాయిని తగ్గించడమేనని పీసీసీ అధ్యక్షుడు రఘువీరారెడ్డి అన్నారు. కేవలం డొమెస్టిక్ టెర్మినల్కు మాత్రమే ఆయన పేరు పెట్టడం ఏంటని ఆయన ప్రశ్నించారు. ఎన్టీయార్ పై మీకున్న గౌరవం అంతేనా అంటూ నిలదీశారు. కేంద్రంలో చక్రం తిప్పానని చెప్పుకునే చంద్రబాబు.. ఎన్టీఆర్ కు భారత రత్న అవార్డును ఇప్పించడంలో ఎందుకు విఫలమయ్యారని ప్రశ్నించారు. ఎన్టీఆర్ పై మీకు నిజమైన ప్రేమ, గౌరవం, అప్యాయతలు వుంటే.. ఆయన స్థాయికి తగ్గట్టుగా భారత రత్న అవార్డును ఇప్పించాలని డిమాండ్ చేశారు.

ఎన్టీఆర్కు వెన్నుపోటు పొడిచి, వైశ్రాయ్ హోటల్లో ఆయనపై చెప్పులు వేయించిన తెలుగుదేశం పార్టీ నాయకులు ఇప్పుడు ఎన్టీఆర్ పేరు గురించి అనవసర రాద్ధాంతం చేస్తున్నారని ఆయన విమర్శించారు. బతికివున్నప్పడు అతని బాగోగులు పట్టించుకోని నాయకులు, అతని మరణానంతరం ఓట్ల కోసం, ఎన్టీయార్ పేరును వాడుకుని అపకీర్తి పాటు చేస్తున్నారని ధ్వమెత్తారు. టీడీపీ నేతల వ్యవహరాలు చూస్తూంటే.. ఎన్టీఆర్ ఆత్మ కూడ క్షోభిస్తుందన్నారు. ఎస్సీ, ఎస్టీ వేధింపుల నిరోధక చట్టాన్ని బీజేపీ నేతలు దుర్వినియోగం చేస్తున్నారని కూడా రఘువీరారెడ్డి ఆరోపించారు.

జి.మనోహర్