తెలంగాణ స్కూల్ పుస్తకాల్లో సోనియా చరిత్ర

Posted: 11/21/2014 09:02 AM IST

తెలంగాణ కాంగ్రెస్ నేత పొంగులేటి సుధాకర్ రెడ్డి కొత్త డిమాండ్ ను తెరపైకి తీసుకొచ్చారు. కాంగ్రెస్ అధినేత్రి సోనియాగాంధీ జీవిత చరిత్రను తెలంగాణ స్కూల్ సిలబస్ లో చేర్చాలని ఆయన కోరుతున్నారు. ఈ మేరకు ముఖ్యమంత్రి కేసీఆర్ కు వినతిపత్రం కూడా అందజేశారు. సోనియాగాంధీ వల్లే తెలంగాణ సాకారం అయిందని.., ఆమెకు నాలుగు కోట్ల ప్రజలంతా రుణపడి ఉంటారని చెప్పారు. సోనియా కృషిని గుర్తిస్తూ ఆమె జీవిత చరిత్రను స్కూల్ పాఠ్య పుస్తకాల్లో చేర్చాలని డిమాండ్ చేస్తున్నారు.

ఇప్పటికే తెలంగాణ ఉద్యమ చరిత్రను చేర్చటంపై అంతర్గతంగా పార్టీల మద్య వివాదం నడుస్తోంది. తెలంగాణ ఉద్యమంలో అన్ని పార్టీలు పాల్గొన్న నేపథ్యంలో ఉద్యమ చరిత్రను పాఠ్యాంశంగా చేరిస్తే తమకు కూడా సమ ప్రాధాన్యం ఇవ్వాలని అన్ని పార్టీలు డిమాండ్ చేస్తున్నాయి. ఈ వివాదం పరిష్కారం కాకముందే.., కొత్తగా మరో డిమాండ్ వచ్చింది. అటు సోనియా చరిత్ర చేర్చాలన్న ప్రతిపాదనపై కాంగ్రెస్ మినహా మిగతా పక్షాలు అభ్యంతరం వ్యక్తం చేస్తున్నాయి. తెలంగాణను రాజకీయ ప్రయోజనంగా వాడుకున్న పార్టీ అధినేత్రి చరిత్రను ఎలా బోధిస్తారు అని ప్రశ్నలు మొదలయ్యాయి. మరి ఈ డిమాండ్ ఎక్కడివరకు వెళ్తుందో త్వరలోనే తేలిపోనుంది.

 

 

కార్తిక్