జూడాలకు హైకోర్టులో చుక్కెదురు.. 2 రోజుల్లో విరమించాల్సిందే

Posted: 11/19/2014 12:20 PM IST

Junior doctors call off strike within 48 hours orders high court

జూనియర్ డాక్టర్లకు హైకోర్టులో చెక్కెదురైంది. జూడాలు చేపట్టిన సమ్మెను 48 గంటల్లోగా విరమించాలని హైకోర్టు ఆదేశించింది. గ్రామీణ సర్వీసు మినహా జానియర్ డాక్టర్ల అన్ని డిమాండ్లను పరిష్కరించాలని అటు ప్రభుత్వాన్ని ఆదేశించింది. ఆ దిశగా చర్యలు చేపట్టాలని తెలంగాణ ప్రభుత్వాన్ని ఆదేశించింది. జూడాల ఆందోళనపై ఇవాళ తీర్పును వెలువరించిన హైకోర్టు.. 48 గంటల్లో జూడాలపై ఎటువంటి చర్యలు చేపట్టవద్దని తెలంగాణ ప్రభుత్వానికి సూచించింది. జూనియర్ డాక్టర్ల ఆందోళన చట్ట వ్యతిరేకమని హైకోర్టు అభిప్రాయపడింది.

వైద్య విద్యలో భాగంగా ఏడాది పాటు గ్రామీణ ఆసుపత్రుల్లో జూడాలు సేవలందించాలన్న ప్రభుత్వ నిర్ణయాన్ని హైకోర్టు సమర్థించింది. అందుకోసం జీవో 107 తెలంగాణ ప్రభుత్వం జారీ చేసింది. దీనిపై ఆగ్రహించిన జూనియర్ డాక్టర్లు అక్టోబర్ 1వ తేదీన సమ్మె బాట పట్టారు. అప్పటి నుంచి వారు నిరవధిక సమ్మెకు దిగడంతో... రాష్ట్రంలోని వివిధ ఆసుపత్రుల్లోని రోగులు తీవ్ర ఇబ్బందులు ఎదుర్కొంటున్నారు. దీంతో సమస్యపై దృష్టి సారించిన హైకోర్టు ఇప్పటికే పలుమార్లు జూడాల సమ్మెపై సీరియస్ గా స్పందించింది. జూడాలు ఏ హోదాలో సమ్మెకు దిగుతున్నారని ప్రశ్నించింది. వారి సమ్మెకు అర్థం లేదని కూడా అభిప్రాయపడింది. సుమారు 50 రోజుల పాటు సాగుతున్న జాడాల సమ్మెపై ఇవాళ తీర్పును వెలువరించింది.

జి.మనోహర్