కాంగ్రెస్ నేతకు ‘లాస్ట్ వార్నింగ్’ ఇచ్చిన సీఎం కొడుకు!

Posted: 11/12/2014 09:42 PM IST

ఈమధ్య రాజకీయరంగంలో అధికారంలో వున్న నేతలకంటే వారి వారసుల హవాయే ఎక్కువగా కొనసాగుతున్నట్టు కనిపిస్తోంది. సాధారణంగా రాజకీయనేతలు ఒకరిమీదొకరు దుమ్మెత్తిపోసుకోవడం.. తరువాత కలుసుకోవడం లాంటివి సంఘటనలు చోటు చేసుకోవడం మామూలే! వారిమధ్య ఎవరూ జోక్యం చేసుకోరు. అయితే ఒక సీఎం కొడుకుమాత్రం ఇటువంటి వ్యవహారంలో వివాదాస్పద కామెంట్లు చేసి వార్తల్లో నిలిచిపోయాడు. ఏకంగా కాంగ్రెస్ నేతనే హెచ్చరించారు. నిన్నటికినిన్నే గోవా ముఖ్యమంత్రిగా ప్రమాణస్వీకారం చేసిన లక్ష్మీకాంత్ పర్సేకర్ కుమారుడు చేసిన వ్యాఖ్యలు ఇప్పుడు సంచలనం సృష్టిస్తున్నాయి.

అసలు జరిగిన విషయం ఏమిటంటే... ఇటీవలే గోవా సీఎం కుమారుడు రిషి(21)పై కాంగ్రెస్ నేత దుర్గాదాస్ కామత్ ఫేస్ బుక్ లో వివాదాస్పమైన ఆరోపణలు చేశారు. రిషి తన తండ్రి నియోజకవర్గమైన మండ్రేమ్ లో అక్రమంగా నిర్వహించిన బుల్ ఫైట్స్ లో పాల్గొన్నాడని రెండో ఫోటోలను కూడా ఫేస్ బుక్ లో పెట్టారు. దీనికి ‘‘సీఎం కుమారుని సమక్షంలో బుల్ ఫైట్’’ అని చివరలో శీర్షిక కూడా పెట్టారు. అయితే ఆ ఫోటోల్లో రిషి ఎక్కడా కనిపించలేదు. ఈ వ్యవహారం మీదే రిషి కూడా స్పందిస్తూ.. ఆ కాంగ్రెస్ నేతకు ఏకంగా తనదైన రీతిలో హెచ్చరికలు జారీ చేశాడు.

తనపై కాంగ్రెస్ నేత చేసిన ఆరోపణల విషయంలో మంగళవారం రాత్రి రిషి ఫేస్ బుక్ లో వివరణ ఇచ్చుకున్నాడు. తాను ఆ ఫోటోల్లో అసలు ఎక్కడా లేనని.. కావాలంటే అన్ని ఫోటోలను ఫేస్ బుక్ లో పెట్టాలని దుర్గాదాస్ ను డిమాండ్ చేశాడు. ఇటువంటి ఆరోపణలను ఇకనుంచి సహించబోమని.. సరైన సమాచారం తెలుసుకున్న తరువాతే ఆధారాలతో  ఫేస్‌బుక్‌లో పెట్టాలని సూచించాడు. ‘‘ఇదే అతనికి లాస్ట్ వార్నింగ్. ఇంకోసారి ఇలాగే పిచ్చివేషాలు వేస్తే.. నేను నా సమయం వృధా చేసుకోను. అసలు నేనేంటో చూపిస్తా’’ అని చివరన సీఎం కుమారుడని కూడా పేర్కొని మరీ హెచ్చరించాడు.

AS