వారణాసిలోని జయపూర్ గ్రామాన్ని దత్తత తీసుకున్న మోడీ

Posted: 11/07/2014 08:13 PM IST

Jayapur village has adopted me not the other way around says pm narendra modi in varanasi

ప్రధాని నరేంద్ర మోదీ తన సొంత నియోజకవర్గమైన వారణాశిలోని జయపూర్ గ్రామాన్ని దత్తత తీసుకుంటున్నట్లు ప్రకటించారు. ఆదర్శ గ్రామం కింద వారణాశి నగరానికి 24 కిలోమీటర్ల దూరంలోని జయపూర్ గ్రామాన్ని మోదీ ఆదర్శ గ్రామంగా అభివృద్ధి చేయనున్నారు. ఆ గ్రామంలో ఏర్పాటు చేసిన సభలో ఇవాళ మోదీ పాల్గొన్నారు. గ్రామ ప్రజలను ఉద్దేశించి మాట్లాడుతూ త్వరలోనే సరికొత్త జయపూర్‌గా అందరం కలిసి గ్రామాన్ని అభివృద్ధి చేసుకుందామని తెలిపారు. పోలియో టీకాలు తదితర అవగాహన కల్పించే అంశాలపై ప్రభుత్వమే ప్రచారం చేయాలా? యువత ఆ బాధ్యతను తీసుకోలేరా అని మోదీ ప్రశ్నించారు.

జయపూర్ లో భ్రూణహత్యల అంశంపై ప్రధాని ప్రసంగించారు. భ్రూణ హత్యలకు పాల్పడుతున్న వారు మహిళలు లేని ప్రపంచాన్ని ఊహించుకోవాలన్నారు. ఇకమీదట జయపూర్ లో భూణహత్యలు జరగకూడదని పిలుపునిచ్చారు. ప్రతి ఏడాది జయపూర్ జన్మదినోత్సవాన్ని జరుపుకొందామని మోదీ చెప్పారు. అనంతరం వారణాశి చేరుకున్న మోదీకి రాష్ట్ర గవర్నర్, ముఖ్యమంత్రి అఖిలేశ్ స్వాగతం పలికారు. వారణాశిలో మోదీ చేతివృత్తుల ఉత్పత్తుల మేళాలో పాల్గొని పలు వస్తువులను ఆసక్తిగా తిలకించారు.

కాగా తాను రెండు గ్రామాలను దత్తత తీసుకుంటున్నట్లు కేంద్రమంత్రి నిర్మలా సీతారామన్ ప్రకటించారు. విజయవాడలో జరిగిన ఒక కార్యక్రమంలో ఆమె మాట్లాడుతూ పశ్చిమగోదావరి జిల్లా నర్సాపురం మండలంలోని పెద్దమైనవలంక, తూర్పు తండా గ్రామాలను దత్తత తీసుకుంటున్నట్లు ప్రకటించారు. 20 సంవత్సరాల నుంచి ఈ గ్రామాలతో తనకు పరిచయం ఉందన్నారు. గ్రామాల దత్తత విధివిధానాలు త్వరలో ప్రవేశపెడతామన్నారు.

జి. మనోహర్