ఎల్ఈడీ వీధి దీపాల ఏర్పాటుకు సర్కార్ యోచన..

Posted: 11/02/2014 05:18 PM IST

Telangana government planning to replace street lights with led lights to avoid power crisis

విద్యుత్తు సంక్షోభం నుంచి గట్టెక్కేందుకు తెలంగాణ ప్రభుత్వం సాంకేతికంగా వస్తున్న విప్లవాత్మకమైన మార్పులను అందిపుచ్చుకుని హైదరాబాద్ నగరంతో పాటు రాష్ట్రంలోని పురపాలక సంఘాలలో విద్యుత్ అదా చేయాలని భావిస్తుంది. ఇందుకు దశలవారీగా ప్రస్తుతం ఉన్న వీధి లైట్ల స్థానంలో ఎల్ఈడీ లైట్లను ఏర్పాటు చేయాలని యోచిస్తోంది. ఇందులో భాగంగా హైదరాబాద్ నగరంలోని 3.27 లక్షల వీధిలైట్లను మార్చి ఎల్ఈడీ లైట్లను ఏర్పాటు చేయనుంది. దీంతో ఏటా రూ.80 కోట్ల వరకు జీహెచ్ఎంసీకి విద్యుత్తు వ్యయం మిగులుతుందని అధికారులు అంచనా వేస్తున్నారు. వచ్చే జనవరి నాటికి నగరమంతటా ఈ లైట్లను ఏర్పాటు చేయడానికి కసరత్తు మొదలుపెట్టారు.

హైదరాబాద్‌లో ఉన్న 3.27 లక్షల వీధిలైట్లలో సంపద్రాయ లైట్లను వినియోగిస్తున్నారు. ఇందుకు ప్రతి నెలా 60 మెగావాట్ల విద్యుత్తును వినియోగిస్తూ... ఏడాదికి రూ.160 కోట్లను బిల్లుల కింద ఖర్చు చేస్తున్నారు. ఇది కాకుండా మరో రూ.40 కోట్లు ఇతరత్రా వాటిపై ఖర్చవుతోంది. నగరంలో ఎల్ఈడీ వ్యవస్థను ఏర్పాటు చేస్తే విదుత్తును పొదుపు చేయొచ్చని జీహెచ్ఎంసీ అధికారులు సీఎం కేసీఆర్ దృష్టికి తీసుకెళ్లగా ఆయన అంగీకరించినట్లు చెబుతున్నారు. ఈ నేపథ్యంలో కొన్ని వీధుల్లో ప్రయోగాత్మకంగా ఈ విధానాన్ని ప్రారంభించారు. ఈ సంస్థ నగరంలోని కొత్తగూడ నుంచి హైటెక్ సిటీ వరకు చాంద్రాయణగుట్ట నుంచి ఫలక్‌నుమా, ఛార్మినార్, నయాఫూల్ వరకు మొత్తం 740 ఎఎల్ఈడీ వీధిలైట్లను నెల రోజుల కిందట ఏర్పాటు చేసింది. దీనివల్ల దాదాపు 55 శాతం విద్యుత్తు ఆదా అయ్యింది. దీంతో హైదరాబాద్‌ సహా ముఖ్య నగరాల్లో ఎల్ఈడీ లైట్లను ఏర్పాటు చేయాలని ప్రభుత్వం భావిస్తోంది.

జి. మనోహర్