ఆరుగుర్ని బలిగొన్న అనంత రోడ్డు ప్రమాదం

Posted: 10/22/2014 07:19 AM IST

అనంతపురం జిల్లాలో జరిగిన ఘోర రోడ్డు ప్రమాదంతో ఆరుగురి జీవితాలు తెల్లారిపోయాయి. గోరుంట్ల మండలం బూచేపల్లి బస్ స్టాప్ దగ్గర బుధవారం తెల్లవారుజామున ఆటో, లారీ ఢీ:కొన్నాయి. ఈ దుర్ఘటనలో ఆరగురు మృతి చెందగా.. మరో నలుగురు తీవ్రంగా గాయపడ్డారు. బెంగళూరు నుంచి వస్తున్న లారీ ఎదురుగా వచ్చిన ఆటోను ఢీ:కొనటంతో ప్రమాదం జరిగింది. క్షతగాత్రులను హిందూపురం ప్రభుత్వ ఆస్పత్రికి తరలించి చికిత్స అందిస్తున్నారు. మృతులంతా పుట్టపర్తి మండలం పెడబల్లికి చెందినవారుగా గుర్తించారు.

ఘటనాస్థలానికి చేరుకున్న పోలిసులు సహాయక చర్యలను చేపట్టారు. బాధితులంతా పొట్టకూటికోసం కూలి పనులు చేసుకునే వేతన జీవులుగా వెల్లడించారు. పెడబల్లి నుంచి కూలి పని కోసం ఆటోలో కర్ణాటకలోని బాగేపల్లి  మార్కెట్ కు వెళ్తుండగా ఈ ప్రమాదం జరిగింది. రెక్కాడితేకాని డొక్కాడని కూలిల కుటుంబాలు మరణవార్త తెలుసుకుని శోకసంద్రంలో మునిగిపోయాయి. దీపావళి పండగకు ముందురోజు జరిగిన ఈ ప్రమాదం తమ ఇంట్లో చీకట్లను నింపింది అని బాధితులు రోదిస్తున్నారు.

కార్తిక్