విశాఖలో ఇవాళ పవన్ కళ్యాణ్, జగన్ పర్యటనలు

Posted: 10/15/2014 09:54 AM IST

హుద్ హుద్ తుఫానుతో తీవ్రంగా దెబ్బతిన్న విశాఖపట్టణంలో జనసేన పార్టీ అధినేత పవన్ కళ్యాణ్ ఇవాళ పర్యటించనున్నారు. తుఫాను ప్రభావిత ప్రాంతాలను పరిశీలించటంతో పాటు.. బాధితులను పరామర్శిస్తారు. తుఫాను వల్ల జరిగిన నష్టం.., పునరావాస, సహాయక కార్యక్రమాలపై బాధితుల నుంచి వివరాలను సేకరిస్తారని సన్నిహితులు తెలిపారు. నగరంలోనే ఉండి సహాయక, పునరావాస చర్యలను పర్యవేక్షిస్తున్న ఏపీ ముఖ్యమంత్రి చంద్రబాబు నాయుడుతో పవన్ సమావేశం అయ్యే అవకాశం ఉంది. తుఫాను బాధితుల సహాయార్ధం పవన్ రూ.50లక్షల విరాళం ప్రకటించిన విషయం తెలిసిందే.

అటు వైఎస్సార్ కాంగ్రెస్ అధినేత జగన్ మోహన్ కూడా విశాఖలో ఇవాళ పర్యటించనున్నారు. రెండవరోజు తుఫాను ప్రభావిత ప్రాంతాల పర్యటనలో భాగంగా విశాఖపట్నంలోని షిప్పింగ్ హార్బర్, జాలారిపేట, ఆంధ్రా వర్సిటీ, పెద్ద గదిలి, ధర్మవరం తాడిచెట్లపాలెం, దుర్గ గుడి, కొబ్బరితోట తదితర ప్రాంతాల్లో పర్యటిస్తారని విశాఖ వైసీపీ నేతలు వెల్లడించారు. బాధితులను కలిసి వారికి అందుతున్న సాయం వివరాలను తెలుసుకోనున్నారు. తొలిరోజు పర్యటనలో భాగంగా తూర్పుగోదావరి జిల్లాలోని రాజమండ్రి తదితర ప్రాంతాల్లో జగన్ పర్యటించి బాధితులను పరామర్శించారు.

కార్తిక్