బిగ్ బిలియన్ డే సేల్ అమ్మకాలపై ఈడీ నజర్

Posted: 10/14/2014 04:26 PM IST

ప్రముఖ ఆన్‌లైన్ షాపింగ్ వెబ్‌సైట్ ఫ్లిప్‌కార్ట్ ఇటీవల నిర్వహించిన 'బిగ్ బిలియన్ డే' సేల్‌పై ఎన్‌ఫోర్స్‌మెంట్ డైరెక్టరేట్(ఈడీ) అధికారులు నజర్ పెట్టారు. బిగ్ బిలియన్ డే అమ్మకాలపై దేశవ్యాప్తంగా పలు ఫిర్యాదులు వెల్లవెత్తిన నేపథ్యంలో ఎన్‌ఫోర్స్‌మెంట్ డైరెక్టరేట్ అధికారులు విచారణ చేపట్టానున్నారు.. ఫ్లిప్‌కార్ట్ ప్రకటించిన భారీ డిస్కౌంట్లపై అభ్యంతరం వ్యక్తంచేస్తూ, ఆన్‌లైన్ షాపింగ్‌లపై నిర్దిష్ట మార్గదర్శకాలను ఏర్పాటుచేయాలని కోరుతూ చిన్న, పెద్ద రిటైల్ వ్యాపారులు ప్రభుత్వానికి ఫిర్యాదులు చేశారు.

ఈ నేపథ్యంలో అక్టోబరు 6న ఫ్లిప్‌కార్ట్ నిర్వహించిన బిగ్‌బిలియన్ డే సేల్‌లో నిబంధనలు ఉల్లంఘించిందా లేదా అనే అంశంపై విచారణ చేపడతామని ఈడీ అధికారులు వెల్లడించారు. ఇక మరోవపు సంస్థ ప్రకటించిన డిస్కౌంట్లు, వాటి ధరలపై కూడా ఈడీ ఆరా తీయనుంది. ఫ్లిప్‌కార్ట్ బిగ్‌బిలియన్ డే సేల్ ఒక్క రోజునే 1.5 మిలియన్ల మంది వెబ్‌సైట్‌లో షాపింగ్ చేయగా, 10 గంటల్లో రూ.600 కోట్ల బిజినెస్ జరిగిందని సంస్థ ఇదివరకే ప్రకటించింది.

జి.మనోహర్