షిర్డీ సాయిపై స్పందించలేమన్న సుప్రీంకోర్టు

Posted: 10/13/2014 01:37 PM IST

సాయి బాబా- ద్వారకాపీఠాధిపతి శంకరాచార్య స్వరూపానంద మద్య వివాదంపై తాము స్పందించలేమని సుప్రీంకోర్టు వ్యాఖ్యానించింది. శంకరాచార్య వ్యాఖ్యలతో మనోభావాలు దెబ్బతిన్నట్లు భావిస్తే.., సివిల్, క్రిమినల్ కేసు పెట్టమని పిటిషన్ దాఖలు చేస్తే విచారిస్తామని తెలిపింది. అంతేకాని ఒక వ్యక్తికి ఉన్న అభిప్రాయ వ్యక్తీకరణ హక్కును కాదనలేము అన్నట్లుగా సుప్రీం వ్యాఖ్యానించింది. స్వరూపానందకు వ్యతిరేకంగా సాయిధామ్ చారిటబుల్ ట్రస్టు దాఖలు చేసిన పిటిషన్ పై స్పందిస్తూ సర్వోన్నత న్యాయస్థానం ఇలా వ్యాఖ్యలు చేసింది.

సాయిబాబా ఓ వర్గానికి చెందిన వ్యక్తి అని ఆయన్ను.., హిందువులు దేవుడిగా పూజించటం సరికాదు అని ద్వారకాపీఠాధిపతి పేర్కొన్నారు. సాయికి హిందూ దేవుళ్ళకు పోలికలు, సంబంధం లేదు కాబట్టి ఎవరూ ఆయన్ను పూజించవద్దనీ.., ఆలయాలు నిర్మించవద్దని సూచించారు. హిందుత్వం అనేది వేదాలు, శాస్ర్తాల ఆధారంగా నిర్మితమై ఆచరించబడుతుందనీ.., అలాంటి సామాజిక జీవనంలో ఎక్కడా సాయి బాబా గురించి ప్రస్తావన లేదనీ..., మరి ఆయన్ని పూజించటం ఎందుకు అని శంకరాచార్య స్వరూపానంద ప్రశ్నించారు. దీనిపై సాయి భక్తుల నుంచి తీవ్ర విమర్శలు వచ్చాయి. స్వరూపానందకు వ్యతిరేకంగా ఆందోళనలు కూడా జరిగాయి. ఇధే సమయంలో ఈ వ్యాఖ్యలను సమర్దిస్తూ ఒక వర్గం ర్యాలి చేపట్టింది.

కార్తిక్