విశాఖకు చేరుకోనున్న నాలుగు యూనిట్ల ఆర్మీ దళాలు..

Posted: 10/09/2014 04:19 PM IST

విశాఖపట్నం తీరప్రాంతానికి నాలుగు మిలటరీ దళాలు చేరుకోకున్నాయి. హుదూద్ తుఫాను నేపథ్యంలో విశాఖ తీరప్రాంతానికి నాలుగు మిలటరీ దళాలను కేంద్రప్రభుత్వం పంపింది. విశాఖపట్నం - గోపాల్పూర్ ప్రాంతాలకు మధ్యలో తుఫాను తీరం దాటనున్నట్లు తుఫాను హెచ్చరికల కేంద్రం ప్రకటించింది. ఈ సమయంలో తీవ్ర విలయం సంభవించే ప్రమాదం ఉందన్న సూచనలతో ఈ చర్యలు తీసుకుంది. అపదలో వున్నవారిని రక్షించే చర్యలు ఆర్మీ చేపట్టనుంది.

మరోవైపు గోదావరి జిల్లాలపై కూడా తుఫాను ప్రభావం తీవ్రంగానే ఉండేలా ఉంది. దాంతో తూర్పుగోదావరి జిల్లాలో తీరం వెంబడి ఉన్న 13 మండలాల ప్రజలను అధికారులు అప్రమత్తం చేశారు. ముందు జాగ్రత్త చర్యగా కాకినాడ, అమలాపురం, రాజమండ్రిలలో కంట్రోల రూంలు ఏర్పాటుచేశారు. సముద్రంలోకి వేటకు వెళ్లిన మత్స్యకారులు వెనక్కి తిరిగి రావాలని తెలిపారు. కాకినాడ పోర్టులోనూ రెండోనెంబరు ప్రమాద హెచ్చరిక ఎగరేశారు. తీరం దాటే సమయంలో తుఫాను వాయువేగంతో దూసుకువస్తుందని,  160 కిలోమీటర్ల నుంచి 180 కిలోమీటర్ల వేగంతో ఈదరుగాలులు వీస్తాయని వాతావరణ శాఖ అధికారులు హెచ్చరించారు. తీరప్రాంతంలో వుండే వారు తుఫాను తీరందాటే సమయానికి ఇళ్లలోనే వుండాలని, బయటకు రావద్దని సూచించారు.

జి. మనోహర్