భారత్ ఖాతాలో కాంస్యాలు.. స్వర్ణం దిశగా మేరికోమ్

Posted: 09/30/2014 01:17 PM IST

ఆసియా క్రీడల్లో భారత మహిళా బాక్సర్లు కాంస్యాలతో సరిపెట్టుకున్నారు. భారత్ ఖాతాలో మరో రెండు పతకాలను ఎల్. సరితా దేవి, పూజా రాణి జమ చేశారు. 60 కేజీల విభాగంలో జరిగిన సెమీస్ లో కొరియా బాక్సర్ జినా పార్క్ చేతిలో సరితా దేవి పరాజయం పాలయింది. మరో భారత మహిళా బాక్సర్ పూజా రాణి కూడా 75 కేజీల విభాగం సెమీస్‌లో చైనా క్రీడాకారిణి లి కియాన్ చేతిలో పూజ ఓడిపోయింది. సెమీ ఫైనల్లో ఓటమి పాలవడంతో సరితా దేవి, పూజా రాణిలకు కాంస్య పతకాలు దక్కాయి.

మరో భారత బాక్సర్ మేరికోమ్ స్వర్ణం పతకం సాధించేందుకు ఒక్క అడుగు దూరంలో నిలిచింది. ఇంచియాన్లో జరుగుతున్న ఏషియన్ క్రీడల్లో ఆమె మహిళల 48-51 కేజీల ఫ్లై వెయిట్ విభాగంలో ఫైనల్స్లోకి ప్రవేశించింది. వియాత్నం బాక్సర్ లి థాయ్ బాంగ్‌ పై మేరికోమ్ 3-0 తేడాతో గెలుపొందింది. ఫైనల్స్లో మేరీకోమ్ విజయం సాధిస్తే భారత్కు మరో పసిడి పతకం దక్కనుంది. ఒకవేళ ఆమె రన్నర్గా నిలిచినా రజిత పతకం దక్కనుంది. క్వార్టర్ ఫైనల్లో తనకంటే 10 ఏళ్లు చిన్నదైన చైనా ప్రత్యర్థి హైజువన్ పై మేరీకోమ్ విజయం సాధించింది

జి. మనోహర్