అగ్రహార జైలులోజయలలిత.. దసరా తరువాతే పునర్విచారణ

Posted: 09/30/2014 12:47 PM IST

అన్నాడీఎంకే అధినేత్రి, తమిళనాడు మాజీ ముఖ్యమంత్రి జయలలితకు కర్ణాటక హైకోర్టులో చుక్కెదురైంది. అమె అక్టోబర్ 6 వరకూ జైల్లోనే గడపాల్సిన పరిస్థితి ఏర్పడింది. అక్రమాస్తుల కేసులో సీబీఐ ప్రత్యేక న్యాయస్థానం వెలువరించిన  తీర్పుపై స్టే విధించాలంటూ ఆమె దాఖలు చేసిన బెయిల్ పిటిషన్ను కర్ణాటక హైకోర్టు ఇవాళ విచారణకు స్వీకరించింది. జయలలిత తరపున ప్రముఖ న్యాయవాది రాంజెఠ్మాలనీ వాదనలు వినిపించారు. ప్రత్యేక కోర్టు తీర్పును సస్పెండ్ చేయాలని విజ్ఞప్తి చేశారు. వాదోపవాదనలు విన్న  న్యాయస్థానం తదుపరి విచారణను అక్టోబర్ 6కు వాయిదా వేసింది.  

దాంతో బెయిలుపై విడుదల కావాలన్నకున్న జయలలిత ఆశలకు గండి పడింది. దసరా సెలవుల నేపథ్యంలోనే ఈ కేసు విచారణను అక్టోబర్ 6కు వాయిదా వేసినట్లు న్యాయవర్గాలు పేర్కొన్నాయి. మరోవైపు బెయిల్ పిటిషన్ విచారణ వాయిదా పడటంతో పార్టీ కార్యకర్తలు నిరాశ చెందారు. ఆదాయానికి మించి ఆస్తులు కలిగి ఉన్నారన్న ఆరోపణలపై సీబీఐ ప్రత్యేక కోర్టు జయలలితకు నాలుగేళ్ల జైలు శిక్ష, వందకోట్ల జరిమానా విధించిన సంగతి తెలిసిందే. జయతో పాటు జైలు శిక్షకు గురైన శశికళ, సుధాకరన్, ఇళవరసిలు బెయిల్ పిటిషన్లు దాఖలు చేశారు.

జి మనోహర్