ఉద్యోగస్తులకు చేదు వార్త! జీర్ణించుకుంటారా..?

Posted: 09/26/2014 07:53 PM IST

Central government canceled holiday on october 2 gandhi jayanthi day

సాధారణంగా నిరుద్యోగస్తులకు ఎప్పుడూ చేదు వార్తలు వస్తూ వుంటాయి. కానీ ఈసారి మాత్రం ఉద్యోగస్తులు జీర్ణించుకోలేని ఓ చేదువార్తను ప్రభుత్వం తెలిపింది. ఎప్పటినుంచో గాంధీ జయంతిరోజున ప్రభుత్వ కార్యాలయాలతోపాటు పాఠశాలలకు సెలవు దినంగా కేంద్రప్రభుత్వం అమలు చేసిన విషయం తెలిసిందే! కొన్ని చోట్ల అయితే ప్రభుత్వ స్కూళ్లలో గాంధీపై, స్వాతంత్ర్య సమరయోధులపై వ్యాసరచన, వక్తృత్వ పోటీలు నిర్వహించి విద్యార్థుల్లో దేశభక్తిని పెంపొందించే ప్రయత్నం చేస్తారు. గాంధీ జయంతి రోజున సెలవు తీసుకుని మంచి పని చేయాలని ఉద్బోధిస్తారు. కానీ ఈసారి మాత్రం అలా కాకుండా.. ప్రత్యేకంగా జరపాలని కేంద్రం నిర్ణయం తీసుకున్నట్లు తాజాగా ఒక ప్రకటనను జారీ చేసింది. అక్టోబర్ 2వ తేదీన గాంధీ జయంతీ సందర్భంగా కేంద్ర ప్రభుత్వ కార్యాలయాలకు సెలవును రద్దు చేస్తూ నిర్ణయం తీసుకుంది. అయితే ఆరోజు ఒక ప్రత్యేక కార్యక్రమాన్ని ఏర్పాటు చేసింది.

‘‘స్వచ్ఛ్ భారత్’’ అనే కార్యక్రమాన్ని విజయవంతం చేసేందుకు గాంధీ జయంతిరోజున ఉద్యోగస్తులందరూ విధులకు హాజరు కావాల్సిందిగా కేంద్రం ఆదేశాలు జారీ చేసింది. ఉద్యోగస్తులందరూ ఆరోజు కేవలం ‘‘స్వచ్ఛ్ భారత్’’ కోసమే పని చేయాలంటూ సూచించింది. మొదటగా ప్రధాని మోడీ ఇండియా గేట్ వద్ద చీపురుతో శుభ్రం చేసి, దేశానికి దిశానిర్దేశం చేయనున్నారు. ఆ తర్వాత ఉద్యోగస్తులు కూడా అటువంటి కార్యక్రమాన్ని నిర్వర్తించాల్సి వుంటుంది. పరిసరాలు శుభ్రంగా వుంటే ప్రజలు ఆరోగ్యంగా వుంటారని కేంద్రం సూచిస్తోంది. అలాగే.. మహాత్మాగాంధీ కూడా పరిశుభ్రతనే కోరుకున్నారని కేంద్రం తెలుపుతోంది. సెలవును రద్దు చేయడం ఉద్యోగస్తులకు చేదు వార్తే కానీ... ప్రభుత్వం తీసుకున్న నిర్ణయం మాత్రం ఎంతో అమోఘం అంటూ విమర్శకులు సైతం ప్రశంసలతో మోడీ ప్రభుత్వాన్ని పొగడ్తలతో ముంచెత్తుతున్నారు.