నటుడు నాగార్జునకు మళ్లీ నోటిసులు

Posted: 09/23/2014 12:48 PM IST

రీల్ లైఫ్ లో హీరోగా కింగ్ పేరు తెచ్చుకున్న నాగార్జునకు రియల్ లైఫ్ లో మాత్రం కష్టాలు తప్పటంలేదు. పైసల కోసం చెరువు పక్కన కన్వెన్షన్ కష్టాలు కొనసాగుతున్నాయి. మాదాపూర్ లోని ‘ఎన్ కన్వెన్షన్’ సెంటర్ విషయంలో నాగార్జునకు మళ్ళీ నోటీసులు పంపారు. నాగ్ తో పాటు సమీపంలోని భూములను ఆక్రమించి నిర్మాణాలు చేపట్టిన వారికి కూడా నోటిసులు ఇచ్చినట్లు శేరిలింగంపల్లి తహసీల్దార్ విద్యాసాగర్ వెల్లడించారు. సర్వేకు సహకరించాలని ఆయన కోరారు. తుమ్మిడికుంట చెరువును ఆక్రమించి కన్వెన్షన్ సెంటర్ కట్టారని గుర్తించిన అధికారులు.., గతంలో నోటిసు ఇవ్వకుండా కూల్చివేతలకు రంగం సిద్ధం చేసుకున్నారు.

అయితే దీనిపై విమర్శలు వచ్చాయి. అక్రమం అని తేలితే చట్ట ప్రకారం వ్యహరించాలి తప్ప అధికారుల ఇష్టా రాజ్యం కాదు అని కోర్టు స్టే ఆర్డర్ ఇచ్చింది. ఈ నేపథ్యంలో నిర్మాణంలో ఆక్రమణలు జరిగాయా.., లేదా అని నిర్ధారించుకునేందుకు మరోసారి సర్వే చేపడుతామని చెప్పారు. ఈనెల 26న చేపట్టే సర్వేలో తుమ్మిడి కుంట చెరువును ఆక్రమించి బఫర్ జోన్ లో కన్వెన్షన్ నిర్మించారా? లేదా? అనేది తేలిపోనుంది. అయితే గతంలోనే అక్రమ కట్టడం అని జీహెచ్ ఎంసీ గుర్తించగా.., కాదు కూడదు అనకుండా.., కట్టడాన్ని కన్వెన్షన్ యాజమాన్యమే స్వయంగా కొంతమేర కూల్చేసుకోవటం గమనార్హం. మరి ఇప్పుడు ఏం జరుగుతుందో..?

కార్తిక్