ఒక్క ఎస్ఎంఎస్ తో రైళ్లలో కోరిన ‘భోజన సేవలు’

Posted: 09/22/2014 11:50 AM IST

రైలు ప్రయాణం చేస్తున్నారా..? రైళ్లలో క్యాటరింగ్ సిబ్బంది ఇచ్చే ఆహారం మీకు నచ్చలేదా..? సుదూర ప్రయాణాలలో కమ్మనైన కోరుకున్న ఆహారం తిని సేద తీరాలనుకుంటున్నారా..? అయితే మాత్రం రైలు ప్రయాణంలో ఎలా సాధ్యం అంటూ నిట్టూరుస్తున్నారా..? ఇక చింతించాల్సిన పనిలేదు.. ఎందుకంటే ఇకపై మీకు ఇష్టమైన ఆహారాన్ని ఒక్క 'ఎస్ఎంఎస్’‌తో పొందే అవకాశాన్ని రేల్వే అధికారులు అందిస్తున్నారు. సాంకేతిక రంగంలో వచ్చిన విప్లవాత్మకమైన మార్పులను అనుసంధానం చేసుకుని రైల్వే శాఖ ప్రయాణికులకు ఈ నెల 25 నుంచి ప్రయోగాత్మక ప్రాజెక్టును అమలుచేయనుంది. ఈ-క్యాటరింగ్‌లో భాగంగా ఎస్ఎంఎస్ ఆధారిత సేవలను అందుబాటులోకి తేవాలని రైల్వేశాఖ నిర్ణయించింది. ఈ నెల 25 నుంచి కొన్ని ఎంపిక చేసిన రైళ్లలో ఈ సేవలను ప్రారంభిస్తారు.

ఈ సౌకర్యం వినియోగించుకొనేందుకు ప్రయాణికుడు ఐఆర్‌సీటీసీ నిర్ణయించిన నెంబరుకు పీఎన్ఆర్ నెంబర్‌తో ఎస్ఎంఎస్ చేయాల్సి ఉంటుంది. వెంటనే సంబంధిత సిబ్బంది ప్రయాణికునికి ఫోన్ చేసి అవసరమైన సమాచారాన్ని తీసుకొని కావాల్సిన ఆహార పదార్థాల వివరాలు నమోదుచేసుకుంటారు. ఆహారం అందిన తర్వాత డబ్బులు చెల్లిస్తే సరిపోతుంది. దీంతోపాటు త్వరలోనే 'ఆన్‌లైన్ అర్డర్' సేవలు కూడా అందుబాటులోకి తెచ్చేందుకు రైల్వేశాఖ సన్నాహాలు చేస్తోంది. రైలు ప్రయాణ సమయంలో ఎస్సెమ్మెస్ ద్వారా భోజనం ఆర్డర్లివ్వడానికి ఇండియన్ రైల్వే క్యాటరింగ్ అండ్ టూరిజం కార్పొరేషన్ (ఐఆర్‌సీటీసీ) కొత్త మొబైల్ నంబర్ ఖరారు చేయనున్నది. ప్రయాణికుల నుంచి ఫిర్యాదులు వెల్లువెత్తుతుండటంతో క్యాటరింగ్ సర్వీసులు మెరుగుపరిచేందుకు రైల్వేశాఖ చర్యలు చేపట్టింది. ప్రయాణికులకు బహుళ సౌకర్యాలు కల్పించడమే తమ లక్ష్యమని రైల్వేశాఖ అధికారులు తెలిపారు.

జి.మనోహర్