ఆస్తుల వ్యవహారంలో నోరుజారిన బాబు!

Posted: 09/19/2014 08:27 PM IST

(Image source from: chandrababu naidu revealed his and family members assets in latest press meet)

ఆంధ్రప్రదేశ్ రాష్ట్రముఖ్యమంత్రి నారాచంద్రబాబు నాయుడు మరోసారి మీడియా సమావేశంలో తన, తన కుటుంబ ఆస్తులను ప్రకటించారు. గతంలో బాబు బ్లాక్ మనీ బాగానే దండుకున్నారనే ఆరోపణలు వచ్చిన నేపథ్యంలో ఆయన తన ఆస్తులను అప్పుడు ప్రకటించిన విషయం విదితమే! అయితే ఈసారి అలాంటి ఆరోపణలు ఏమీ రాకముందే బాబు తన ఆస్తులను నాలుగోసారి ప్రకటించారు. ఎథిక్స్ కమిటీకి తన, కుటుంబ సభ్యుల ఆస్తుల వివరాలు సమర్పిస్తున్నట్లు ఆయన వెల్లడించారు. ఇక హెరిటేజ్ విషయానికి వస్తే.. కుటుంబ జీవనానికి ఏదో ఒక ఆధారం వుండాలనే దానిని ప్రారంభించినట్లు ఆయన తెలిపారు.

గతేడాదితో పోల్చుకుంటే ఈసారి తమ బ్యాంక్ బ్యాలెన్స్ కొంచెం పెరిగిందని బాబు వెల్లడించారు. అలాగే తన భార్య పేరిట వున్న ప్రావిడంట్ ఫండ్, బంగారం కూడా పెరిగాయని తెలిపారు. నిర్వహణ హోల్డింగ్స్ ఆస్తులు రూ.90 లక్షలు పెరిగాయని తెలిపారు. ఇక తమ వ్యక్తిగత ఆస్తులను ప్రకటిస్తూ.. తన పేరిట రూ.70.69 కోట్లు, భార్య భువనేశ్వరి పేరిట రూ.46.88 కోట్లు, కుమారుడు లోకేష్ పేరిట రూ.11.04 కోట్లు, కోడలు బ్రహ్మణి పేరిట రూ.5.32 కోట్లు వున్నట్లు ఆయన ప్రకటించారు. భవిష్యత్తులో తన కుటుంబసభ్యులు ఎవరికి వారే తమ ఆస్తులను ప్రకటిస్తారని ఆయన స్పష్టం చేశారు.