జమ్మూలో మళ్ళీ వర్షాలు.. నిలిచిన సహాయక చర్యలు

Posted: 09/14/2014 11:09 AM IST

వరదలతో అతలాకుతలం అయిన జమ్మూ కాశ్మీర్ ను మరోసారి వర్షాలు ముంచెత్తుతున్నాయి. శుక్రవారం నుంచి కురుస్తున్న వర్షాలతో జమ్మూ లోయలు మరోసారి జలసంద్రం అవుతున్నాయి. గతవారం కురిసిన వర్షాలకే కుదేలయిన కాశ్మీరం.., తాజా భారీ వర్షాలతో మరింత నష్టపోతుంది. అటు సహాయక చర్యలకు కూడా తీవ్ర ఆటంకం కల్గుతోంది. వర్షాల వల్ల ఆర్మీ, వైమానిక దళ హెలికాప్టర్లు సహాయక చర్యల్లో పాల్గొనలేకపోతున్నాయి. దీంతో నీటిలో, ముంపు ప్రాంతాల్లో ఉన్న ప్రజలు సహాయం కోసం ఆర్దిస్తున్నారు. అటు మరో రెండ్రోజుల పాటు శ్రీనగర్ ను వర్షాలు మంచెత్తుతాయని వాతావరణ శాఖ తెలిపింది.

గతవారం కురిసిన వర్షాలు జమ్మూకు ఇప్పట్లో కోలుకోలేని నష్టాన్ని మిగిల్చాయి. దాదాపు మూడు వందల మంది ప్రాణాలు కోల్పోగా., లక్షల మంది నిరాశ్రయులయ్యారు. వేల సంఖ్యలో ఇళ్ళు నేలమట్టం అయ్యాయి. ఆర్మీ, విపత్తు నిర్వహణ, వైమానిక దళ బృందాలు సహాయక చర్యల్లో పాల్గొని వేల సంఖ్యలో ప్రజల్ని సురక్షిత ప్రాంతాలకు తరలించాయి. ప్రధానిమోడి ఈ ప్రకృతి నష్టాన్ని జాతీయ విపత్తుగా ప్రకటించి వెయ్యి కోట్ల రూపాయల సాయం ప్రకటించారు. జమ్మూను కేంద్రం ఆదుకుంటుందని హామి ఇచ్చారు. అయితే తాజా వర్షాలతో వరదనష్టంపై మరింత ఆందోళన మొదలైంది.

కార్తిక్