మరో ఎన్నికల సమరానికి లేచిన తెర

Posted: 09/13/2014 09:47 AM IST

మరో ఎన్నికల సమరానికి తెరలేచింది. మహారాష్ట్ర, హర్యానా రాష్ట్రాల అసెంబ్లీ ఎన్నికలకు కేంద్ర ఎన్నికల కమీషన్ నగారా మోగింది. మహారాష్ట్రలోని 288, హర్యానాలోని 90 అసెంబ్లీ స్థానాల ఎన్నికలకు సంబంధించి సీఈసీ షెడ్యూల్‌ విడుదల చేసింది. ఈ రెండు రాష్ట్రాల్లోనూ ఒకే దశలో అక్టోబర్‌ 15వ తేదీన ఎన్నికలు నిర్వహించనుంది. 19న కౌంటిగ్‌ నిర్వహించి ఫలితాలు విడుదల ప్రకటించనుంది. 90 మంది సభ్యులున్న హర్యానా శాసనసభ పదవీ కాలం అక్టోబరు 27న, 288మంది సభ్యులున్న మహారాష్ట్ర శాసనసభ గడువు నవంబరు 8న ముగియనుంది. వీటితో పాటు అరుణాచల్ ప్రదేశ్, మణిపూర్, నాగాల్యాండ్, ఉత్తరప్రదేశ్, గుజరాత్‌లలో ఐదు అసెంబ్లీ స్థానాలకూ అక్టోబర్ 15న ఉప ఎన్నికలు నిర్వహించనుంది.

సుప్రీం కోర్టు ఆదేశాల మేరకు గత సార్వత్రిక ఎన్నికల నుంచే అమల్లోకి వచ్చిన నోటా బటన్‌ను ఈ సారి కూడా ఈవీఎంలలో కేంద్ర ఎన్నికల సంఘం నిక్షిప్తం చేయనుంది. అంతేకాక ఓటరు తన ఓటు ఎవరికి వేశామో తెలుసుకునేందుకు వీలుండే పేపటర్‌ ట్రయల్ని .. మహారాష్ట్రలో 3942 పోలింగ్‌ కేంద్రాలలోనూ, హర్యానాలో 959 పోలింగ్‌ కేంద్రాల్లోనూ ప్రయోగాత్మకంగా పరిశీలించేందుకు ఎన్నికల కమీషన్ సన్నాహాలు చేసింది. ఎన్నికలక షెడ్యూల్‌ విడుదలైనందున ఆయా రాష్ట్రాల్లో ఎన్నికల కోడ్‌ తక్షణమే అమల్లోకి వచ్చిందన్న కేంద్ర ఎన్నికల కమీషన్.. వరదలతో అతలాకుతలమవుతున్న జమ్మూకశ్మీర్‌ లో ప్రశాంత వాతావరణం నెలకన్న తరువాతే అసెంబ్లీ ఎన్నికలను నిర్వహణపై ఓ నిర్ణయానికి వస్తామని ప్రకటించింది.

జి.మనోహర్