బాధిత జమ్మూకు ఏపీ సాయం

Posted: 09/10/2014 03:53 PM IST

Ap government sent relief fund to flood affeclted kashmir

వరద భీభత్సంతో వణుకుతున్న జమ్మూ కాశ్మీర్ దుస్థితిపై ఆంద్రప్రదేశ్ స్పందించింది. బాధిత రాష్ర్టానికి సాయం ప్రకటించింది. రూ.5కోట్ల వరద సాయం ప్రకటించింది. 300మెట్రిక్ టన్నుల ఆహార పధార్ధాలను అందించాలని నిర్ణయించింది. ముందుగా అత్యవసరంగా 145మెట్రిక్ టన్నుల ఆహార పధార్ధాలను విమానం ద్వారా పంపించింది. త్వరలోనే మిగతా సాయాన్ని అందిస్తామని ఏపీ ప్రభుత్వ విపత్తు నిర్వహణా ఉన్నతాధికారులు తెలిపారు. ప్రజలు కూడా స్వచ్చందంగా సాయం చేయవచ్చని సూచించారు.

వరదలతో సర్వం కోల్పోయిన జమ్మూ ప్రజలకు ఆంధ్రప్రదేశ్ అండగా నిలుస్తుందని రాష్ర ప్రభుత్వం ప్రకటించింది. అవసరమైతే మరింత సాయం చేసేందుకు కూడా సిద్దమని ప్రభుత్వ నేతలంటున్నారు. భారీ వర్షాలతో వరదలు రావటంతో జమ్మూలో ఇప్పటివరకు 200పైగా ప్రజలు ప్రాణాలు కోల్పోయారు. వేల సంఖ్యలో ఇళ్ళు నేలమట్టం అయ్యాయి. ఇక లక్షల సంఖ్యలో ప్రజలు నిరాశ్రయులయి సాయం కోసం ఎదురుచూస్తున్నారు. గత మూడ్రోజులతో పోలిస్తే వరదలు తగ్గినా ఇప్పటికీ చాలామంది నీటిలోనే చిక్కుకుని సాయం కోసం ఎదురుచూస్తున్నారు. భారత సైనికులు, వైమానిక దళం సహాయక చర్యల్లో పాల్గొంటున్నాయి. విపత్తు నిర్వహణా బృందాలు ప్రత్యేక విమానాలు, పడవల ద్వారా బాధితులను సురక్షిత ప్రాంతాలకు తరలిస్తున్నారు.

అయితే సాయం చేయటానికి వచ్చిన విపత్తు నిర్వహణా బృందం అధికారులపై స్థానికులు తిరగబడ్డారు. ఆలస్యంగా సాయం చేయటానికి వచ్చారంటూ ఓ ప్రాంతంలో ప్రజలు ఇద్దరు సిబ్బందిపై దాడి చేయగా వీరిలో ఒకరు తీవ్ర గాయాలపాలయ్యారు. వెంటనే అధికారిని చికిత్స కోసం చండీఘర్ ఆస్పత్రికి తరలించారు. అటు సాయం చేసేందుకు వస్తున్న హెలికాప్టర్లపై కూడా ప్రజలు ఆగ్రహంతో రాళ్ళు వేస్తుండటంతో చాపర్లు కిందకు దిగలేకపోతున్నాయి. ఇలాంటి చర్యల వల్ల సహాయక చర్యలకు తీవ్ర ఇబ్బంది కలుగుతోందని అధికారులు అంటున్నారు. తమకు ఎలాంటి రాజకీయ ఉద్దేశ్యాలు లేకుండా సాయం కోసమే పనిచేస్తుంటే దాడులు చేయటం సరికాదని ఆర్మీ, సహాయక బృందాలు అంటున్నాయి.

కార్తిక్