కాశ్మీర్లో కాల్చిపారేసిన జవాన్లు

Posted: 09/10/2014 10:42 AM IST

జమ్మూ కాశ్మీర్ లో ఆర్మీ జవాన్లకు తీవ్రవాదులకు మద్య భారీ ఎన్ కౌంటర్ జరిగింది. పాకిస్థాన్ నుంచి కెరాన్ సెక్టార్ ద్వారా తెల్లవారుజామున దేశంలోకి ప్రవేశించేందుకు ఉగ్రవాదులు ప్రయత్నించగా ఆర్మీ అప్రమత్తమై కాల్పులు జరిపింది. వీరిపై ఉగ్రవాదులు తిరిగి కాల్పులు జరపగా.., ఇరువర్గాల మద్య భారీ ఎన్ కౌంటర్ జరిగినట్లు ఆర్మీ ఉన్నతాధికారులు తెలిపారు. ఈ ఎన్ కౌంటర్ లో దుగురు ఉగ్రవాదులను ఆర్మీ మట్టుబెట్టినట్లు తెలుస్తోంది. ఉగ్రవాదులు భారీగా ఆయుదాలు, విద్వంసకర సామాగ్రి కలిగి ఉన్నట్లు సైన్యం వెల్లడించింది.

ఒక వైపు వరదల విలయం నుంచి ప్రజలను రక్షించేందుకు ఆర్మీ సహా ఇతర విభాగాలు తీవ్రంగా శ్రమిస్తుండటంతో.., దీన్ని ఆసరాగా చేసుకున్న ఉగ్రవాదులు సరిహద్దులో సైన్యం తక్కువగా ఉంటుందని భావించి చొరబాట్లకు యత్నిస్తున్నారు. అయితే సహాయక చర్యలతో పాటు, సరిహద్దు రక్షణను కూడా సమర్ధంగా నిర్వహిస్తున్న సైన్యం, ఉగ్రవాదులను మట్టుబెట్టింది. భారత ఆర్మీ, సరిహద్దు రక్షణా దళం అప్రమత్తతపై హర్షం వ్యక్తం అవుతోంది. ప్రజలను కాపాడుతూనే దేశ రక్షణ కోసం అహర్నిశలూ వారు కృషి చేస్తున్నారని ప్రజలు అంటున్నారు.

భారీ వరదలతో పాటు త్వరలో చలికాలం మొదలవుతుండటం కూడా చొరబాట్లకు ఉగ్రవాదులకు కలిసి వచ్చే అంశం. హిమఖండమైన కాశ్మీరంలో చలికాలంలో దట్టంగా మంచు కప్పేసుకుని ఉంటుంది. ఈ మంచులో ఎవరు వస్తున్నారు. ఎవరు వెళ్తున్నారు అని గుర్తించటం కష్టం. దీనికి తోడు మంచుకురుస్తుండగా విధులు నిర్వర్తించటం కూడా సైన్యంకు కొంత కష్టంతో కూడుకున్న పని. దీన్ని ఆసరాగా చేసుకునే ఉగ్రవాదులు చలికాలంలో ఎక్కువగా దేశంలోకి చొరబడుతుంటారు. అయితే చాలికాలం ప్రారంభం కాకముందే చొరబాట్లు పెరగటంతో ఆర్మీ మరింత అప్రమత్తంగా ఉండాల్సిన అవసరముంది.

కార్తిక్