గుంటూరులో కుప్పకూలిన బిల్డింగ్

Posted: 09/10/2014 12:00 AM IST

Under construction building collapsed in guntur

గుంటూరు పట్టణంలో బుధవారం ఉదయం ప్రమాదం సంభవించింది. విద్యానగర్ ప్రాంతంలో నిర్మాణంలో ఉన్న ఓ భవనం కుప్పకూలింది. భవనానికి స్లాబ్ వేసేందుకు ఈ ఉదయం కూలిలు సెంట్రింగ్ పని చేస్తుండగా భవనం కుప్పకూలిపోయింది. సెంట్రింగ్ మొత్తం కూలి కిందపడటతో కూలిలు, మిగతా పనివారంతా తీవ్ర భయాందోళనకు గురయ్యారు. ప్రాణాలు కాపాడుకోవటానికి అక్కడి నుంచి పరుగులు పెట్టారు. అంతా అప్రతమత్తంగా వ్యవహరించటంతో అదృష్టవశాత్తు ఎలాంటి ప్రాణనష్టం జరగలేదు. వాచ్ మెన్ కు గాయాలైనట్లు తెలుస్తోంది.

ప్రమాదం జరిగిన సమయంలో భవనంలో దాదాపు 50మంది కూలిలు ఉన్నట్లు స్థానికులు చెప్తున్నారు. అటు భవనం కూలిపోవటంతో వచ్చిన శబ్దానికి స్థానికులు కూడా తీవ్ర భయాందోళన చెందారు. విషయం తెలుసుకున్న పోలిసులు ఘటనపై ఆరా తీశారు. ప్రమాదంకు భవన నిర్మాణంలో లోపాలా? లేక సెంట్రింగ్ పనుల్లో జరిగిన తప్పిదమా తెలియాల్సి ఉంది. రాజధాని ఏర్పాటు ప్రకటన తర్వాత గుంటూరు, సమీప ప్రాంతాల్లో భవనాల నిర్మాణాలు పెరిగాయి. రాజధాని ఏర్పడితే ఇండ్ల అద్దెలు పెరుగుతాయని భావించి చాలామంది త్వరగా బిల్డింగులు కట్టడం మొదలు పెట్టారు. ఇలా పనులువేగంగా చేయించటం వల్ల కూడా ప్రమాదాలు జరుగుతున్నట్లు తెలుస్తోంది.

కార్తిక్