అలస్య వర్షం. ఆంద్రప్రదేశ్ లో నష్టం

Posted: 09/09/2014 05:30 AM IST

ఏపీకి వానగండం పట్టుకుంది. రాష్ర్టంలో కురిసిన భారీ వర్షాలకు వాగులు, వంకలతో పాటు నదులు కూడా నిండిపోయాయి. వరదలు వచ్చి లోతట్టు ప్రాంతాలు జలమయం అవుతున్నాయి. ఎగువ ప్రాంతాల్లో కురుస్తున్న వర్షాలతో పోలవరం మండలానికి వరద వచ్చి చాలా గ్రామాలు నీటిలో మునిగిపోయాయి. సుమారు 25గ్రామాలకు రాకపోలు నిలిచిపోయాయి. రోడ్డు మార్గం లేకపోవటంతో కొండలపై నుంచి గిరిజనులు సురక్షిత ప్రాంతాలకు చేరుకుంటున్నారు. వరదలపై అప్రమత్తమైన అధికారులు పోలవరంలో కంట్రోల్ రూం ఏర్పాటు చేశారు.

పోలవరంతో పాటు సమీప ప్రాంతాలైన కొత్తూరు, కొవ్వూరు, ఆచంట, ఎలమంచిలి మండలాలు వరద ముప్పుతో వణుకుతున్నాయి. తూర్పు, పశ్చిమ గోదావరి జిల్లాల్లో లోతట్టు ప్రాంతాలు చాలావరకు నీట మునిగాయి. దీంతో ఎప్పుడేం జరుగుతుందో అని ప్రజలు భయపడుతున్నారు. ఇక పంటలు కూడా విపరీతంగా దెబ్బతిన్నాయి. తూర్పుగోదావరి జిల్లాలో వర్షాల వల్ల వెయ్యిహెక్టార్లలో పంటనష్టం జరిగింది. దవళేశ్వరం వద్ద గోదావరి ఉదృతంగా ప్రవహిస్తోంది. అటు కృష్ణా జిల్లాలో కూడా వరదలపై లోతట్టు ప్రాంతాల ప్రజలు భయాందోళన వ్యక్తం చేస్తున్నారు.

తెలంగాణలో కూడా వర్షం భీభత్సం సృష్టిస్తోంది. వర్షాకాలం చివర్లో విస్తారంగా పడుతున్న వర్షాలతో నదులు, జలాశయాలు నిండుతున్నా.. పంటలు తీవ్రంగా దెబ్బతింటున్నాయి. వర్షాలు లేకపోవటంతో భూగర్బ నీటి ఆదారంగా పంటలు వేసిన రైతులు తాజా వర్షాలతో పంట నష్టపోయి కుదేలవుతున్నారు. అనుకున్న సమయంలో వానలు కురవక నష్టపోగా.., ఇప్పుడు అవసరం లేకున్నా వచ్చి మరింత ముంచేస్తున్నాయని ఆవేదన వ్యక్తం చేస్తున్నారు. తమను ప్రభుత్వం ఆదుకోవాలని అన్నదాతలు విజ్ఞప్తి చేస్తున్నారు.

కార్తిక్