ఏపీ రాజధానిపై సీమాంధ్రలో ఆందోళనలు

Posted: 09/04/2014 03:10 PM IST

రాజధానిపై అసెంబ్లీలో చంద్రబాబు చేసిన ప్రకటన సీమాంధ్రలో ప్రకంపనలు సృష్టిస్తోంది. తమకు దగ్గర్లో రాజధాని వస్తుందని కృష్ణా, గుంటూరు, ప్రకాశం, గోదావరి జిల్లాల ప్రజలు సంతోష పడుతున్నారు. అయితే ఇదే సమయంలో రాష్ర్టంలోని కొన్ని జిల్లాల ప్రజలు మాత్రం విజయవాడను రాజధానిగా అంగీకరించమని చెప్తున్నారు. ముఖ్యమంత్రి ప్రకటనకు వ్యతిరేకంగా ఆందోళనలు చేపడుతున్నారు. రాజధానిపై చంద్రబాబు పట్ల ఆంద్ర యునివర్సిటీ మండిపడింది. విద్యార్థి సంఘాలు బాబు దిష్టిబొమ్మను దహనం చేశాయి. శివరామకృష్ణన్ కమిటీ సూచనలు పరిగణలోకి తీసుకోకుండా ప్రకటన చేశారని విద్యార్థులు ఆగ్రహం వ్యక్తం చేస్తున్నారు. విశాఖ మినహా ఉత్తరాంధ్ర అభివృద్ధికి ఏ విధమైన ఫలాలు ప్రకటంచలేదన్నారు. బాబు ప్రకటనకు వ్యతిరేకంగా విద్యార్థులు బంద్ కు పిలుపునిచ్చారు.

మరోవైపు రాయలసీమలోనే రాజధాని ఏర్పాటు చేయాలని ఆ ప్రాంతంలో ఇఫ్పటికే ఆందోళనలు కొనసాగుతున్నాయి. ముఖ్యమంత్రి ప్రకటన వెలువడగానే.., ప్రజలు రోడ్లపైకి వచ్చి తమ నిరసన తెలుపుతున్నారు. భాషా ప్రయుక్త రాష్ర్టంగా ఆంధ్రప్రదేశ్ ఏర్పడినపుడు జరిగిన శ్రీభాగ్ ఒప్పందాన్ని అమలు చేయాలని సీమ ప్రజలు ప్రధానంగా డిమాండ్ చేస్తున్నారు. సీమ క్యాపిటల్ కోసం కడప, కర్నూలు జిల్లాల్లో ఇవాళ బంద్ జరుగుతోంది. తమకు కేటాయింపులు, స్మార్ట్ సిటీలు వచ్చినా.., రాజధాని వస్తే అంతకు మించిన అభివృద్ధి జరుగుతుందని ప్రజలు అంటున్నారు.

 

కార్తిక్