కేంద్రరైల్వేమంత్రి సదానంద కొడుకు కార్తీక్‌పై ‘‘420’’!

Posted: 08/29/2014 10:40 AM IST

(Image source from: bangalore rt police filed case on karthik gowda under ipc sections 376 420)

కన్నడ వర్ధమాన నటి మైత్రేయి గౌడ తనను పెళ్లిచేసుకుంటానని నమ్మించి, మోసం చేశాడంటూ కేంద్రమంత్రి సదానంద గౌడ్ కుమారుడు కార్తీక్ గౌడపై ఆరోపణలు చేసిన సంగతి తెలిసిందే! ఈ విషయమై ఆమె బుధవారం రాత్రి పోలీసులకు ఫిర్యాదు చేసింది. దీంతో పోలీసులు కార్తీక్‌పై ఐసీపీ 376, 420 సెక్షన్ల కింద బెంగుళూరులోని ఆర్టీ నగర్ పోలీస్ స్టేషన్‌లో కేసు నమోదు చేశారు. అలాగే నటి మైత్రేయికి వైద్య పరీక్షలు కూడా నిర్వహించారు.

ఈ నేపథ్యంలోనే ఆమె మాట్లాడుతూ.. తనకు వేరే అమ్మాయితో నిశ్చితార్థం జరిగిందని, ఇకపై కలిసి వుండటం కుదరదు అంటూ కార్తీక్ చెప్పినట్టు ఆమె పేర్కొంది. తనను ముందే పెళ్లి చేసుకున్నాడని.. ఇప్పుడు మోసం చేసి వేరే అమ్మాయితో నిశ్చితార్థానికి సిద్ధమైతే తన పరిస్థితి ఎలా..? అంటూ ఆమె ప్రశ్నించింది. తనకు న్యాయం జరిగేంతవరకు పోరాటం సాగిస్తానని.. తనను కేంద్రమంత్రి కుటుంబసభ్యులు కోడలిగా అంగీకరించాల్సిందేనని ఆమె కోరుకున్నారు.

మరోవైపు ఈ విషయాన్ని ఖండించిన కేంద్రమంత్రి సదానంద గౌడ.. తనపై ఎవరో రాజకీయ కుట్రపన్నారని ఆరోపించారు. తన కొడుకును అన్యాయంగా ఇరికిస్తున్నారని ఆయన అన్నారు. కాగా, ఈ ఘటనకు సంబంధించి సదానంద గౌడను బీజేపీ జాతీయ అధ్యక్షుడు అమిత్‌షా వివరణ కోరినట్లు సమాచారం! అటు ఈ వ్యవహారంపై కాంగ్రెస్ హస్తం వున్నట్టు వచ్చిన ఆరోపణలను కర్ణాటక హోంమంత్రి జార్జి ఖండించారు. దర్యాప్తు తర్వాతే చర్యలు తీసుకుంటామని స్పష్టం చేశారు. ఇదిలావుండగా.. కార్తీక్ నిశ్చితార్థం రోజే నటి మైత్రేయి ఫిర్యాదు చేయడం చర్చనీయాంశంగా మారింది.