వినాయక ‘‘బకెట్ చాలెంజ్’’! ఒక మంచి ఆలోచన..

Posted: 08/29/2014 10:01 AM IST

(Image source from: Anchor jhansi is introducing vinayaka bucket challenge)

ప్రస్తుతం ప్రపంచవ్యాప్తంగా బాగా పాపులర్ పొందిన ‘‘ఐస్ బకెట్ ఛాలెంజ్’’ గురించి అందరూ వినే వుంటారు. పెద్దపెద్ద దిగ్గజాల నుంచి ప్రతిఒక్కరూ ఇందులో భాగస్వా్మ్యం అవుతున్నారు. ఇక మన ఇండియాలో అయితే ఇదొక స్టంట్‌లా మారిపోయింది. మిగతావారి సంగతేమోగానీ.. మన తెలుగువాళ్లు మాత్రం దీనిని ఛాలెంజ్ చేస్తూ.. ‘‘రైస్ బకెట్ ఛాలెంజ్’’ను తెరమీదకు తీసుకొచ్చారు. దాంతో ఆమె అనూహ్యస్పందన రావడమేకాక కొంతమంది అదే తరహాలో బియ్యాన్ని పేదలకు పంచుతున్నారు కూడా! ఇప్పుడు వినాయకచవితి పండుగ సందర్భంగా ‘‘వినాయక బకెట్ ఛాలెంజ్’’ అంటూ ముందుకు వస్తున్నారు.

నేటి వెబ్ ప్రపంచంలో దుమారం రేపుతున్న ఐస్ బకెట్ ఛాలెంజ్‌లా మనం కూడా ఒక కొత్త ఛాలెంజ్‌ను ప్రారంభిద్దామంటూ.. ఈ ‘‘వినాయక బకెట్ ఛాలెంజ్’’ను పరిచయం చేస్తోంది యాంకర్ ఝాన్సీ! మన ఇంట్లో పూజించిన గణపతిని మన వాకిట్లోనే శాస్త్రాక్తంగా ఓ బకెట్ నీటిలో నిమజ్జనం చేద్దామన్నారు. ఒక గంటలో విగ్రహం కరిగిపోతే.. ఆ నీటిని మొక్కలకు పోసి, అడుగున ఉన్న మట్టిని తులసి కోటలోనో, పూల మొక్కల్లోనే వేసుకోవాలని ఝాన్సీ సూచించారు. ఈ బకెట్ నిమజ్జనం ఫోటోని కానీ, వీడియో కానీ ఫేస్‌బుక్‌లోనే, యూట్యూబ్‌లోనో అప్‌లోడ్ చేయండని ఆమె చెప్పారు. ఇలా చేయడం ద్వారా మనం మన చెరువులలో వున్న నీటిని కలుషితం కాకుండా కాపాడుకోవచ్చని ఆమె పేర్కొంది.

యాంకర్ ఝాన్సీ తీసుకున్న ఈ నిర్ణయం ఎంతో అమోఘమైంది. ఈమె అన్నట్టు మనందరం ఫాలో అయితే.. నీటిని కలుషితం కాకుండా చూసుకోవచ్చు. పెద్దపెద్ద విగ్రహాలను కూడా చెరువులలో, నదులలో వేయకుండా ఒక పెద్ద బకెట్‌లాంటి నిర్మాణాల్లో వేసి.. తర్వాత ఆ నీటిని మొక్కలకు నాటడానికి ఉపయోగిస్తే రెండువైపులా ప్రయోజనం కలుగుతుంది. ఒకవైపు నీటిని కలుషితం కాకుండా కాపాడుకోవడం.. మరోవైపు మొక్కలను నాటి వాతావరణ కాలుష్యాన్ని అరికట్టడం!