జపాన్ భాషలో ట్వీట్ చేసిన ప్రధాని మోడీ!

Posted: 08/28/2014 12:53 PM IST

ప్రధాని నరేంద్రమోడీకి ట్విటర్ ఫాలోయింగ్ ఎలా వుందో మనందరికీ తెలిసిందే! భారతీయ రాజకీయరంగంలో ఇంతవరకు ఏ నాయకుడికీ లేనివిధంగా ట్విటర్ లో మోడీని ఫాలోయింగ్ వుంది. ఒకవిధంగా చెప్పుకోవాలంటే.. సోషల్ నెట్ వర్కింగ్ రాజకీయం కూడా మోడీ ద్వారానే అమలులోకి వచ్చిందని చెప్పుకోవడంలో ఎటువంటి సంశయం లేదు. అంటే.. ఒక భారతీయ నాయకుడిగా మొట్టమొదటిసారిగా ట్విటర్ రికార్డును బ్రేక్ చేసింది ఈయనే! నిత్యం ట్విటర్ లో ప్రజాసంక్షేమ విషయాల గురించి, తన ప్రభుత్వం గురించి, కొత్తకొత్త పథకాల గురించి ట్వీట్ చేస్తూ మోడీ ప్రజలకు మరింత దగ్గరయ్యారు. మొత్తంగా ట్విటర్ లోనూ మోడీ సంచలనాలు సృష్టించేస్తున్నారన్నమాట!

ఇదిలావుండగా.. తాజాగా నరేంద్రమోడీ మరో కొత్త ట్విటర్ సంచలనాన్ని సృష్టించారు. మొదటిసారిగా ఆయన తన ట్విటర్ అకౌంట్ లో జపాన్ భాషలో ట్వీట్ చేశారు. మోడీ ఆగస్టు 30వ తేదీన జపాన్ కు వెళుతున్న సందర్భంగా ఇలా ట్వీట్ చేసి, అందరినీ చమత్కరించారు. ఈ సందర్భంగానే ఆయన ట్విటర్ లో స్పందిస్తూ.. జపాన్ దేశీయులతో నేరుగా జపనీస్ భాషలోనే మాట్లాడవచ్చు కదా అని ఆ దేశంలో వుండే కొందరు మిత్రులు సూచించిన మేరకు తాను ఇలా ట్వీట్ చేశారని స్పష్టం చేశారు. జపాన్ భాషలో రాసేందుకు తనకు సూచనలిచ్చిన మిత్రులు సహకరించారని.. అందుకు వారికి కృతజ్ఞతులు చెప్పుకుంటున్నానని ఆయన అన్నారు.

జపాన్ భాషలో మోడీ ట్వీట్ చేసిందేమిటంటే... జపాన్ ప్రధానమంత్రి షింజో ఎబెను కలిసేందుకు తాను ఎంతో ఆతృతతో వున్నానని.. తాను షింజో నాయకత్వ లక్షణాలను ఎంతగానో గౌరవిస్తానని పేర్కొన్నారు. జపానీయుల సృజన, నైపుణ్యం, సూక్ష్మదృష్టి ప్రశంసనీయమని కితాబిచ్చారు. జపాన్, భారత్ లు పరస్సరం నేర్చుకోవాల్సింది చాలా వుందని సూచించారు. మోడీ ఇలా ట్వీట్ చేసినందుకు మన భారతీయులు కూడా హర్షం వ్యక్తం చేశారు.

AS