రూ.2 వేలకే విమాన ప్రయాణం. ఆఫర్ !!

Posted: 08/25/2014 02:44 PM IST

Travel in spice jet flight only for rupees 1 888

విమాన ప్రయాణం చేయాలని ప్రతి ఒక్కరికి ఉంటుంది. జీవితంలో ఒక్కసారయినా విమానం ఎక్కితే చాలు అనుకునే వారు చాలమంది ఉన్నారు. అటువంటి వారి కోసమే ఆఫర్లు ప్రకటిస్తోంది. స్పైస్ జెట్ విమాన సంస్థ. వినాయక చవితి, దసరా, దీపావళి ఇలా వరుసగా పండగలు వస్తుండటంతో వాటిని క్యాష్ చేసుకోవాలని చూస్తోందీ సంస్థ. ఇందుకోసం విమాన చార్జీలు భారీగా తగ్గించింది. కేవలం రూ.1,888కే విమానంలో ప్రయాణించే అవకాశం కల్పస్తోంది. అయితే ఇది అన్ని రూట్లలో కాదు. కేవలం ఎంపిక చేసిన కొన్ని మార్గాలకు మాత్రమే. విదేశాలకు కాదు.., దేశంలో ఒక చోటు నుంచి మరొక చోటుకు.

ఈ ఏడాది సెప్టెంబర్ 25 నుంచి వచ్చే ఏడాది జనవరి 15లోపు ప్రయాణించేవారికి మాత్రమే ఈ ఆఫర్ వర్తిస్తుంది. కేవలం పరిమిత కాలం మాత్రమే ఉండే ఈ ఆఫర్ ఈనెల 27తో ముగుస్తుంది. అప్పటిలోపు బుక్ చేసుకున్నవారికి అదికూడా సీట్లుంటే టికెట్ వస్తుంది. ఫస్ట్ కమ్ ఫస్ట్ సర్వ్ పద్దతిన టికెట్లు అందిస్తున్నారు. అయితే ఈ ఆఫర్ కింద టికెట్లు బుక్ చేసుకున్న వారికి రద్దు చేసుకున్నా డబ్బులు వాపస్ ఇవ్వరు. అంతేకాకుండా ఇతరుల పేర్లపైకి టికెట్లను మార్చరు. ఎవరు బుక్ చేసుకుంటే వారికే ప్రయాణించే అవకాశం అని స్పైస్ జెట్ ప్రతినిధులు చెప్తున్నారు.

కండిషన్ల మాట అటుంచితే.., కేవలం రూ.1,888కే విమానం ఎక్కే అవకాశం కల్పించటంపై సగటు ప్రయాణికులు సంతోషం వ్యక్తం చేస్తున్నారు. పండగ సీజన్లో ఇంటికెళ్ళాలంటే వెయ్యి రూపాయలకు తగ్గకుండా వదిలించుకుంటున్నారు. ప్రభుత్వ సర్వీసులు కూడా ఇందుకేం తక్కువ తీసిపోవటం లేదు. అలాంటిది రూ.2వేల లోపు విమాన ప్రయాణం ఉండటంతో కాస్త ధర ఎక్కువైనా.., ఫ్లయిట్ ఎక్కామన్న గుర్తు కోసం పర్వా లేదంటున్నారు సగటు ప్రయాణికులు. అటు తాజా ఆఫర్ తో దేశీయ ఇతర విమాన సర్వీసులకు స్పైస్ జెట్ సవాల్ విసిరింది. దీంతో ప్రయాణికులను ఆకర్షించేందుకు మిగతా విమాన సంస్థలు కొత్త ఆఫర్లను తీసుకొచ్చే పనిలో ఉన్నాయి. ‘‘ఉందిలే మంచి కాలం ముందు ముందుగా.., అందరూ ఎగరాలి విమానంలోన’’.

కార్తిక్