బోగస్‌ తెల్లరేషన్‌ కార్డుదారుల గుండెల్లో రైళ్లు

Posted: 08/24/2014 10:45 AM IST

ఇటీవల జరిగిన సమగ్ర కుటుంబ సర్వేతో, కొన్నేళ్లుగా అక్రమంగా ప్రభుత్వ సబ్సిడీ పొందుతున్న తెల్లదొరల గుట్టు బట్టబయలు కానుండడంతో వీరంతా బెంబేలెత్తుతున్నారు.

ముందుగా బోగస్‌ రేషన్‌ కార్డులు, బోగస్‌ పెన్షన్లు ఏరివేయాలని సర్కార్‌ భావిస్తోంది. సమగ్ర కుటుంబ సర్వే డేటా కంప్యూటరీకరించగానే గ్రామాల వారీగా అధికారులు పేదల జాబితాను రూపొందిస్తారు. ఈ మేరకు పేదలకు సంక్షేమ పథకాలను అమలు చేస్తారు. జిల్లాలో ప్రస్తుతం 13 లక్షలకు పైగా తెల్లరేషన్‌ కార్డులు ఉండగా ఇందులో లక్షన్నరకు పైగా ఇటీవల ఏరివేశారు. సర్వే డేటా ఆధారంగా ధనవంతులను గుర్తించి వారిపై వేటు వేస్తారు.

జిల్లాలో గడిచిన నెల రోజుల్లో లక్షన్నరకుపైగా బోగస్‌ తెల్లరేషన్‌ కార్డులను ఏరివేసిన విషయం తెలిసిందే. ఇందులో అధికంగా రేషన్‌ డీలర్ల దగ్గర ఉన్నవాటినే స్వాధీనం చేసుకున్నారు. ఇక ధనవంతులు, అర్హత లేని వారు కూడా పెద్ద సంఖ్యలో తెల్లరేషన్‌ కార్డులు పొందారు. వీరి సంఖ్య మూడు లక్షలకు పైగా ఉంటుందని అంచనా. ఇటీవల జరిగిన కుటుంబ సమగ్ర సర్వేలో ఇటువంటి వారి జాతాకాలన్నీ బట్టబయలయ్యాయి.

కోటీశ్వరులు కూడా తెల్లరేషన్‌ కార్డు వాడుకుంటున్నారు. తాము పేదలమని చెప్పుకుంటూ కొన్నేళ్లుగా ప్రభుత్వ సబ్సిడీలను వాడుకుంటున్నారు. కొందరు అర్హులైన పేదలకు అసలు రేషన్‌ కార్డులే లేవు. ఇలాంటి కుటుంబాలు జిల్లాలో లక్షన్నర వరకు ఉంటాయని అంచనా. బోగస్‌ తెల్లరేషన్‌ కార్డులన్నీ రద్దు చేసి అర్హులైన పేదలకు తెల్లరేషన్‌ కార్డులు ఇవ్వాలని ప్రభుత్వం భావిస్తోంది. ఇందులో భాగంగా ఇటీవల జరిగిన సర్వే డేటా ఆధారంగా అనర్హులను నిర్ధాక్షిణ్యంగా ఏరివేసేందుకు సర్కార్‌ వ్యూహం రచిస్తోంది.

ఇటీవల సమగ్ర సర్వేలో కుటుంబ సభ్యుల వివరాలతో పాటు చర, స్థిరాస్తులు, వాహనాలు, ఏసీలు, ఇంట్లో జంతువుల వివరాలను కూడా నమోదు చేసిన సంగతి తెలిసిందే. జిల్లా వ్యాప్తంగా గతంలో కంటే కుటుంబాల సంఖ్య దాదాపు అయిదు లక్షలకు పైగా పెరిగింది. గతంలో 14.5 లక్షల ఉన్న కుటుంబాల సంఖ్య ఇప్పుడు 19 లక్షకు పైగా నమోదైంది. ఇంకా సర్వే చేయాల్సిన కుటుంబాలు కూడా ఉన్నాయి. మొత్తం కుటుంబాల డేటాను అధికారులు కంప్యూటరీకరిస్తున్నారు. మరో పది రోజుల్లో ఈ ప్రక్రియ పూర్తి కానుంది. దీని ఆధారంగా జిల్లాలో అసలు పేదలు ఎవరూ? ధనవంతులెవరనేది తేలిపోతుంది. దీని ఆధారంగా సంక్షేమ పథకాలను రూపకల్పన చేస్తారు.