సర్వేకు ‘‘ఎంపీ కవిత’’ డుమ్మా.. ఐనా వివరాలు నమోదు!

Posted: 08/20/2014 11:04 AM IST

Mp kavitha escaped from samangra kutumba survey but officers enters details of her

తెలంగాణ రాష్ట్రంలో మంగళవారం (19-08-2014)నాడు సమగ్ర కుటుంబసర్వే జరిగిన విషయం తెలిసిందే! అయితే ఈ సర్వేలో కొన్ని చర్చనీయాంశమైన అంశాలు వెలుగులోకి వచ్చాయి. ఒకవైపు పవన్ కల్యాణ్, విజయశాంతి ఈ సర్వేలో తమ వివరాలు నమోదు చేసుకోకపోతే.. మరొకవైపు సాక్షాత్తూ సీఎం కేసీఆర్ కుమార్తె, ఎంపీ కవిత.. అసలు తెలంగాణాలోనే లేకుండా ఈ సర్వేకు డుమ్మా కొట్టారు. ఇక్కడివరకు బాగానే వుంది కానీ... ఎంపీ కవిత దీనికి డుమ్మా కొట్టినప్పటికీ అధికారులు మాత్రం ఆమె పూర్తి వివరాలు నమోదు చేసుకున్నారు. దీంతో ఇప్పుడు ఇది హాట్ టాపిక్ గా మారిపోయింది. రూల్స్ ను క్రియేట్ చేసే అధికారులే.. ఇలా బ్రేక్ చేస్తే ఎలా అంటూ విమర్శలు గుప్పిస్తున్నారు.

సాధారణంగా ఎంపీ కవిత అత్తగారి ఊరు నిజామాబాద్ జిల్లా నవీపేట మండలంలోని పొతంగల్! స్థానికంగా ఎంపీ కవిత తన అత్తమామల దగ్గర లేకపోయినప్పటికీ.. వారు మాత్రం కవిత పూర్తి వివరాలను ఈ సర్వేలో నమోదు చేయించారు. సర్వే నియమాల ప్రకారం.. వ్యక్తి తన సొంతఊరిలోని ఇంట్లో వుండి తనకు సంబంధించిన అన్ని వివరాలను నమోదు చేయించాలి. కానీ ఇలా కాకుండా ఎంపీ కవిత లేకపోయినా అధికారులు ఆమె వివరాలను నమోదు చేశారు. దీంతో ఇప్పుడు ఇది చర్చనీయాంశంగా మారింది. ఈ విషయాన్ని కొంతమంది మీడియా ప్రతినిధులు కలెక్టర్ రొనాల్డ్ రాస్ దృష్టికి తీసుకెళ్లగా.. దీనిపై స్పందించిన ఆయన అధికారులపై చర్యలు తీసుకుంటామని తెలిపారు. రానురాను ఇది మరెన్ని వివాదాలను సృష్టించనుందోనని అనుకుంటున్నారు.