మోడీకి ఉత్తరాలు రాసిన ఆ అమ్మాయి ఎవరు..?

Posted: 08/07/2014 03:32 PM IST

నరేంద్రమోడీ ప్రధాని పగ్గాలు చేపట్టకముందు నుంచి ఒక అమ్మాయి తరుచూ ఆయనకు ఉత్తరాలు రాయడం మొదలుపెట్టింది. ఆయన ప్రధాని అయిన తరువాత కూడా ఉత్తరాలు వస్తూనే వుండటంతో కొంతమంది భిన్నాభిప్రాయాలను వ్యక్తం చేశారు. తరుచుగా ఇన్నేసి మోడీకి ఉత్తరాలు రాస్తుంటే ఎవరో సన్నిహితులే అయి వుండవచ్చునని పేర్కొన్నారు. ఈ క్రమంలోనే ఆ ఉత్తరాల్లో ఏముందా అని ఆరా తీసిన తరువాత అసలు విషయం బయటపడింది.

ముంబయికి చెందిన ఐశ్వర్య కాంకే అనే ఒక పదహారేళ్ల అమ్మాయి ప్రధాని మోడీకి నిత్యం లేఖలు రాయడాన్ని ఒక అలవాటుగా మార్చుకుంది. అందులో తను నివాసం వుంటున్న ఆ ప్రాంతంలోని సమస్యల గురించి వివరిస్తూ, వాటిని త్వరగా పరిష్కరించవలసిందిగా పేర్కొనేది. ఆమె రాసే ఉత్తరాలకు రిప్లయ్ అందకపోయినా అవేమీ పట్టించుకోకుండా సమస్యల్ని పరిష్కరిస్తే చాలనే ఆశాభావంతో ఉత్తరాలు రాయడం మానలేదు. ప్రస్తుతం ఈ అమ్మాయి ముంబయిలోని కేఈఎస్ ష్రాఫ్ కళాశాలలో విద్యాభ్యాసం చేస్తోంది.

ఇదిలావుండగా.. ఇటీవలే ఆ అమ్మాయికి ప్రధాని మోడీ నుంచి రిప్లయ్ గా ఒక ఉత్తరం వచ్చింది. అందులో ఆయన ఆమె దస్తూరి ఎంతో పొందికగా వుందని.. ఆ అమ్మాయి లేఖల్లో ఎత్తి చూపుతున్న సమస్యలు ఆలోచించిదగినవిగా వున్నాయని ఆయన పేర్కొంటూ లేఖ రాశారు. దీంతో ప్రధాని నుంచి ఉత్తరం వచ్చిందన్న ఆనందంలో పొంగిపోతూ ఆ అమ్మాయి.. ‘‘నేను రిప్లయ్ ఆశించి ఎన్నడూ లేఖలు రాయలేదని.. నిత్య జీవితంలో ఎదురయ్యే సమస్యలను ప్రధాని దృష్టికి తీసుకెళ్లడానికి మాత్రమే ప్రాధాన్యతనిచ్చానని’’ తెలిపింది.

AS