‘‘సెల్ఫీ’’ తీసుకుంటూ.. బుల్లెట్ పేలి పోయాడు!

Posted: 08/05/2014 09:37 AM IST

ప్రస్తుతకాలంలో సెలబ్రిటీల నుంచి నెటిజన్ల వరకు అందరికీ సెల్ఫీలు తీసుకోవడం మహా సరదా అయిపోయింది. చేతిలో ఒక స్మార్ట్ ఫోన్ వుంటే చాలు... ఎక్కడబడితే అక్కడా, ఎలాబడితే అలా సెల్ఫీలు తీసుకుంటూ తమ స్నేహితులకు చూపించుకుని సంబరపడిపోతుంటారు. కొంతమంది అయితే సాహసాలు చేస్తూ తీసుకుంటే... మరికొందరు జ్ఞాపకాల కోసం ప్రత్యేకంగా తీసుకుంటారు. కానీ మరీ దుస్సాహసాలు చేస్తూ సెల్ఫీలు తీసుకుంటే మాత్రం ప్రాణాలు బలైపోతాయని ఈ తాజా సంఘటన అందరికీ నిదర్శనంగా నిలుస్తోంది.

మెక్సికన్ వెటర్నరీ డాక్టర్ అయిన అస్కార్ ఒటిరోకి అందిరిలాగే సెల్ఫీలు తీసుకుంటూ సరదాగా కాలం గడిపేవాడు. అందమైన అమ్మాయిల్ని కౌగిలించకుటూ, మోటార్ బైక్స్ పై విన్యాసాలు చేసుకుంటూ, ఇంకా రకరకాలుగా నిత్యం సెల్ఫీలు తీసుకునేవాడు. ఈ నేపథ్యంలో సెల్ఫీ పిచ్చి పరాకాష్టకు చేరి... ఒక దుస్పాహసానికి పాల్పడ్డాడు ఆ డాక్టర్. బుల్లెట్లతో ఫుల్ గా లోడెడ్ అయి వున్న ఒక తుపాకీని తలకు దగ్గరగా పెట్టుకుని ఫోటో దిగాలని ముచ్చటించాడు. అయితే సెల్ఫీ తీసుకునే సరదాలో ఆ తుపాకీలో బుల్లెట్లు వున్నాయన్న సంగతిని మర్చిపోయి దానిని నొక్కేశాడు. ఇక అంతే సంగతులు! బుల్లెట్ నేరుగా అతని తలలోకి వెళ్లిపోయింది. చికిత్స నిమిత్తం ఆసుపత్రికి తరలించేలోపే అతను ప్రాణాలు కోల్పోయాడు. సాహసాలు చేయాలిగానీ... పిచ్చితో కాదు, ఛాలెంజింగ్ గా చేయాలి!!!

AS