విద్యార్థుల భవిష్యత్తు పైన రాజకీయాలు వద్దు - సుప్రీమ్ కోర్ట్

Posted: 08/04/2014 02:54 PM IST

Do not spoil studies of telangana andhra studnets by politicizing telangana division supreme court

విద్యార్థుల భవిష్యత్తు పైన రాజకీయాలు వద్దని, సెప్టెంబరు మొదటి వారంలో తరగతులు ప్రారంభించాలని సుప్రీం కోర్టు ఆదేశించింది. సమయం ఇస్తే సమస్యలు పెరుగుతాయని, ప్రవేశాల పైన రాజకీయ ప్రభావం ఏమాత్రం ఉండవద్దని, విద్యార్థుల పైన విభజన ప్రభావం పడవద్దని, తెలంగాణ, ఆంధ్రా విద్యార్థులంటూ వేర్వేరుగా చూడొద్దని సుప్రీంకోర్టు హితవు పలికింది. ఉన్నత విద్యామండలి నోటిఫికేషన్ ప్రకారం కౌన్సెలింగ్‌కు వెళ్లాలని ఆదేశించింది. పూర్తి స్థాయి తీర్పును సోమవారం (11న) సుప్రీం కోర్టు వెల్లడించనుంది.

రాష్ట్ర విభజనకు, విద్యార్థులకు సంబంధం లేదని తెలిపింది. ఉన్నత విద్యామండలి ఆదేశాల మేరకే కౌన్సెలింగ్ జరపాలని సుప్రీం కోర్టు ఆదేశించిందని ఏపీ తరఫు న్యాయవాది తెలిపారు. ఆంధ్రా, తెలంగాణ పదాలే వద్దని చెప్పిందన్నారు. రాష్ట్రపతి ఉత్తర్వుల ప్రకారమే స్థానికతను నిర్ధారించాలని సుప్రీం కోర్టు చెప్పిందన్నారు.

ఎంసెట్ కౌన్సెలింగ్‌పై న్యాయస్థానం సోమవారం విచారణ జరిపి,స్థానికత పైన ఉమ్మడి రాష్ట్రంలోని నిబంధనలే వర్తిస్తాయని ,ఆగస్టు 31వ తేదీ లోగా అడ్మిషన్ల ప్రక్రియ పూర్తి చేయాలని ఆదేశిస్తూ తదుపరి విచారణను సోమవారం (11వ తేదీ) నాటికి వాయిదా వేసింది.

విద్యార్థుల భవిష్యత్తు పైన తాము తీసుకున్న నిర్ణయాన్ని భారత అత్యున్నత న్యాయస్థానం సుప్రీం కోర్టు సమర్థించిందని ఆంధ్రప్రదేశ్ మంత్రి గంటా శ్రీనివాస రావు సోమవారం అన్నారు. రాష్ట్ర విభజనతో విద్యార్థులకు సంబంధం లేదని, ఆగస్టు 31వ తేదీన కౌన్సెలింగ్ పూర్తి చేయాలని సుప్రీం కోర్టు ఆదేశించిన నేపథ్యంలో గంటా స్పందించారు.ఎవరైనా రాజ్యాంగానికి అనుకూలంగానే వ్యవహరించాలని స్ఫష్టమైందని ఆయన అన్నారు.