కోడిపుంజు దెబ్బకు బలైపోయిన పసిపాప!

Posted: 08/04/2014 02:53 PM IST

ఇంటి వరండాలో ఆనందంగా ఆడుకుంటున్న ఓ ఎనిమిది నెలల పాప జీవితం కోడిపుంజు దాడి చేయడంతో మృతి చెందింది. దీంతో ఇంటి మహాలక్ష్మీ చనిపోయిందని ఆ కుటుంబసభ్యులు భోరుమంటూ ఆవేదనను వ్యక్తం చేస్తున్నారు. నల్లగొండ జిల్లా మునుగోడు మండలం లక్ష్మీదేవిగూడెంలో నివాసం వుంటున్న కొంపల్లి సైదులు, గీతలకు ఎనిమిది నెలలక్రితం మొదటి సంతానంగా జన్మించిన ఈ పాప.. తిరిగిరాని లోకాలకు వెళ్లిపోయింది.

పాప పేరు జాహ్నవి. ఈ పాప తల్లిదండ్రులది వ్యవసాయ కుటుంబం కావడంతో వారు కోళ్లను పెంచుకుంటున్నారు. గురువారం ఉదయం తల్లి పాపను ఇండి వరండాలో పడుకోబెట్టి పనులు చేసుకోవడంలో నిమగ్నమయిపోయింది. ఆ సమయంలోనే కోడి పాప వద్దకు వచ్చి తలపై బలంగా పొడవడంతో తలకు తీవ్ర గాయమయి రక్తస్రావం ఎక్కువైంది. ఈ ఘటనను గమనించిన కుటుంబసభ్యులు వెంటనే ఆ పాపను తీసుకుని స్థానిక వైద్యుని దగ్గరకు ప్రథమ చికిత్స చేయించారు. అయితే ఆ అమ్మాయికి మెరుగైన వైద్యం ఇప్పించాల్సిందిగా సదరు డాక్టరు కోరగా.. వారు వెంటనే నల్లగొండలోని ప్రైవేటు పిల్లల ఆసుపత్రికి తీసుకెళ్లారు.

అయితే శనివారం జాహ్నవి అపస్మారక స్థితిలోకి వెళ్లిపోవడంతో ఆ పాపను వెంటనే హైదరాబాద్ కు తీసుకువెళ్లాల్సిందిగా అక్కడి వైద్యులు సూచించారు. దీంతో కుటుంబసభ్యులు హుటాహుటిన ఆ పాపను హైదరాబాద్ కు తీసుకెళ్లారు. అక్కడి డాక్టర్లు జాహ్నవి ప్రాణాలను కాపడటానికి ఎంత ప్రయత్నించినా... ఫలితం దక్కలేదు. ఆసుపత్రిలోనే చికిత్స పొందుతూ ఆ అమ్మాయి తుదిశ్వాసను విడిచింది. అయితే తల్లిదండ్రులు అజాగ్రత్తగా వ్యవహరించడం వల్లే జాహ్నవి ప్రాణాలను విడిచిందని గ్రామస్థులు పేర్కొంటున్నారు.

AS