బోనాల సందర్భంగా కెసిఆర్ బంగారు బోనం

Posted: 07/20/2014 01:10 PM IST

బోనాల సందర్భంగా తెలంగాణా రాష్ట్ర ముఖ్యమంత్రి కె చంద్రశేఖరరావు హైద్రాబాద్ పాతబస్తీలోని లాల్ దర్వాజా మహంకాళి అమ్మవారికి బంగారు బోనం సమర్పించారు.  బంగారు బోనాన్ని తలమీద పెట్టుకుని మహంకాళి ఆలయానికి విచ్చేసిన కెసిఆర్ కి అక్కడ పూజారులు పూర్ణకుంభంతో ఘనస్వాగతం పలికారు.

మహంకాళి ఆలయాన్ని అభివృద్ధికి కృషి చేస్తానని, విస్తరణ కోసం భూమిని కేటాయించి ఆలయ నిర్మాణాన్ని నాలుగు కాలాలపాటు గుర్తుండేలా చేస్తానని మాటిచ్చిన కెసిఆర్ అమ్మవారి దీవెనలు ప్రజలందరిమీదా ఉండాలన్న తన ఆకాంక్షను వెల్లడి చేసారు.

ఉప ముఖ్యమంత్రి మహమూద్ అలీ, హోం మంత్రి నాయిని నర్సింహారెడ్డి, ప్రభుత్వ సలహాదారు రమణాచారి, జిహెచ్ఎంసి కమిషనర్ సోమేశ్ కుమార్ కూడా ముఖ్యమంత్రితో పాటు అమ్మవారి దర్శనం చేసుకున్నారు.  

దీనికి ముందు హరిబౌలి లోని అక్కన్న మాదన్న ఆలయంలో కూడా కెసిఆర్ ప్రత్యేక పూజలు నిర్వహించారు. తెలంగాణా రాష్ట్రంలో ముఖ్యమైన పండుగల్లో ఒకటైన బోనాలు వచ్చే సంవత్సరం నుంచి ఇంకా ఘనంగా జరిపిస్తామంటున్నారు కెసిఆర్.

-శ్రీజ