అప్పుల్లో మునిగిపోయిన ఉస్మానియా యూనివర్శిటీ

Posted: 07/19/2014 12:39 PM IST

ఉస్మానియా యూనివర్సిటీ కేవలం మన హైదరాబాద్ లోనే కాదు... దేశవ్యాప్తంగా ఎన్నో పేరు ప్రతిష్టలను మూటగట్టుకున్న విద్యాసంస్థ. అటువంటి మహోన్నత విద్యా సంస్థ ఇప్పుడు అప్పుల్లో మునిగి తేలుతోందని తాజా సమాచారాలు వెలువడుతున్నాయి. సిబ్బంది వేతనాల చెల్లింపు కోసం యూనివర్సిటీ అధికారులు బ్యాంకు రుణాల కోసం పరుగులు పెడుతున్నారని నివేదికలు తెలుపుతున్నాయి. ఒకవైపు వ్యయాలు భారీగా పెరిగిపోతుంటే.. మరోవైపు ప్రభుత్వం విడుదల చేస్తున్న గ్రాంట్లకు మధ్య భారీ వ్యత్యాసం వుంటోందని... ఇటువంటి పరిణామాల వల్ల యూనివర్సిటీ ఇంకా అప్పుల ఊబిలో కూరిపోయేలా చేస్తున్నాయని అధికారులు పేర్కొంటున్నారు.

ఉస్మానియా వర్సిటీలో బోధన - బోధనేతర సిబ్బంది వేతనాలు, యూనివర్సిటీ నిర్వహణకు సంబంధించి మొత్తం వ్యయం దాదాపు 27 కోట్ల మేర వరకు వుంటుంది. అయితే ప్రభుత్వం నుంచి వీరికి కేవలం రూ.14 కోట్ల మాత్రమే ఫండ్లు విడుదలవుతున్నాయి. అదికూడా నెలకు ఒకసారి కాదు... వారికి వీలు కుదిరినప్పడు.. అంటే మూడు లేదా నాలుగు నెలలకొకసారి ప్రభుత్వం నిల్వలను విడుదల చేస్తోంది. దీంతో ఓయూ యాజమాన్యం వారికి వేతనాలు చెల్లించడంలో తీవ్ర లోటు ఏర్పడుతోంది.

తాజాగా 2013-14 ఆర్థిక సంవత్సరానికి సంబంధించి నాలుగో క్వార్టర్ నిధులు ఇంతవరకు విడుదల కాలేదు. దీంతో జూన్ నెలలో ఇవ్వాల్సిన వేతనాలను చెల్లించేందుకు ఓయూ బ్యాంకుల నుంచి రుణాల తీసుకుని గట్టెక్కింది. ఒక జూలై కూడా 10 రోజుల్లో ముగియనుంది. అయితే ప్రభుత్వం నుంచి ఇంకా నిల్వలు విడుదల కాకపోవడంతో వర్సిటీ అధికారులు ఆందోళనల్లో మునిగిపోయారు. పైగా ఏటా పెరుగుతున్న పెన్షన్లు కూడా వర్సిటీగా భారంగా మారుతున్నాయి. మరి ఈ నేపథ్యంలో కేసీఆర్ ప్రభుత్వం వర్సిటీ అధికారులను అప్పుల బాధ నుంచి బయటికి రప్పిస్తాయో లేదో వేచి చూడాల్సిందే !