సీఎం సీటుకోసం దొబ్బులాడుకున్న కాంగ్రెస్ నేతలు

Posted: 07/17/2014 03:42 PM IST

సార్వత్రిక ఎన్నికలు జరిగిపోయి నెలరోజులయ్యింది. ఇటు తెలంగాణ, అటు ఆంధ్రప్రదేశ్ లో రెండు కొత్త ప్రభుత్వాలు కూడా ఏర్పడ్డాయి. తమను తాము నిరూపించుకోవడానికి రెండు రాష్ట్రాల సీఎంలు అహర్నిశలు కష్టపడుతున్నారు. మరి ఘోరంగా పరాజయం పాలయిన కాంగ్రెస్ నేతలు సీఎం సీటు ఎందుకు గొడవ పడుతున్నారబ్బా..? అని తీవ్రంగా ఆలోచించుకుంటున్నారా..!? అయితే మీరు పప్పులో కాలేసినట్టే!

అసలు విషయం ఏమిటంటే... తెలంగాణలో వున్న కాంగ్రెస్ నేతలు తమ సీనియర్ నేతలపై మండిపడుతున్నారు. అధికారం చేతిలో వున్నంతకాలం కేవలం ఒకరికొకరు సీఎం పదవి కోసం కొట్టుకున్నారే తప్ప... ప్రజల సంక్షేమం గురించి ఆలోచించకుండా, పార్టీని పట్టించకోకుండా కుంభకోణాలకు పాల్పడ్డారని ఒకరికొకరు కాంగ్రెస్ నేతలే ఆరోపణలు చేసుకుంటున్నారు. సార్వత్రిక ఎన్నికల్లో కాంగ్రెస్ పార్టీ ఘోరంగా పరాజయం కావడానికి కారణం సీనియర్ నేతలే అంటూ నాయకులు ఒకరిమీద ఒకరు నిందలు మోపుకుంటున్నారు.

హైదరాబాద్ లోని గాంధీభవన్ లో జరిగిన కాంగ్రెస్ పార్టీ సమావేశంలో ఎవరికి వారుగా కాంగ్రెస్ సీనియర్ నేతలపై తమ ఆగ్రహాన్ని వ్యక్తం చేశారు. ప్రత్యేక రాష్ట్రం ఇచ్చిన పార్టీగా కాంగ్రెస్ తెలంగాణాలో గుర్తింపు పొందినా.. దానిని ఓట్ల రూపంలో మలుచుకునేందుకు సీనియర్ నాయకులు చిత్తశుద్ధితో పనిచేయలేదని విమర్శలు చేసుకుంటున్నారు. తెలంగాణ కాంగ్రెస్ సీనియర్ నేతలందరూ కేవలం సీఎం కుర్చీ కోసం లాబీయింగ్ పై దృష్టి సారించారే తప్ప.. పార్టీని పట్టించుకున్న ప్రణాళికలే లేవని వారన్నారు.

సాక్షాత్తూ సోనియాగాంధీ నిర్వహించిన సభ కూడా తెలంగాణాలో విఫలం అయిందంటే దానికి కేవలం సీనియర్ నాయకులు, మాజీ మంత్రులే కారణమని ఆవేదన వ్యక్తం చేశారు. ఇన్ని వైఫల్యాలు ఎదురయినా ఎవరికీ బుద్ధి రాలేదన్న నాయకులు... ఇప్పుడు పొన్నాలను పీసీసీ పీఠం నుంచి దించే ప్రయత్నంలో వున్నారే తప్ప.. పార్టీని క్షేత్రస్థాయిలో పటిష్టం చేసే ఆలోచనలు చేయడం లేదని వారు ఆరోపించుకుంటున్నారు. ఇప్పటికైనా బుద్ధి తెచ్చుకుని, మంచి నాయకత్వంతో ప్రజల మధ్యలోకి చేరి, వారికి అనుగుణంగా ప్రణాళికలను సిద్ధం చేసుకుంటే.. తిరిగి పార్టీని పటిష్టం చేసుకోవచ్చని చివరికి సలహాలు ఇచ్చుకుంటున్నారని సమాచారం!