అవసరమైతే విద్యాసంవత్సరం పొడిగిస్తాం!

Posted: 07/17/2014 08:57 AM IST

ఫీజు రియంబర్స్ మెంట్ మీద నిర్ణయం తీసుకోవటంలో జాప్యమౌతోంది, తెలంగాణా విద్యార్థుల భవిష్యత్తు నాశనమౌతోంది అంటూ భారతీయ జనతా పార్టీ తెలంగాణా రాష్ట్ర అధ్యక్షుడు కిషన్ రెడ్డి బుధవారం పెద్ద ఎత్తున ముఖ్యమంత్రి కె చంద్రశేఖర రావు మీద ధ్వజం ఎత్తారు.  దానికి జవాబు కెసిఆర్ మరోసార్ తన విధానం మీద స్పష్టతనిచ్చారు.

మంత్రి వర్గ సమావేశం జరిగిన తర్వాత మీడియా ప్రతినిధులతో మాట్లాడుతూ, తెలంగాణాలో పుట్టిన నికార్సైన విద్యార్థులకే ఫీజ్ రియంబర్స్ మెంటు జరుగుతుందని, 1956 సంవత్సరాన్ని పరిగణనలోకి తీసుకోవటంలో అర్థం, అందుకు కారణాలున్నాయని, తెలంగాణా పిల్లలకు మాత్రమే ఫీజ్ రియంబర్స్ మెంట్ చెయ్యాలని తెలంగాణా ప్రభుత్వం కోరుకుంటున్నదని అన్న కెసిఆర్, ఏం మీ పిల్లలకు మీరు ఫీజు కట్టుకోలేరా అంటూ ఆంధ్ర ప్రదేశ్ ప్రభుత్వాన్ని ఉద్దేశించి ప్రశ్నను సంధించారు.

మధ్యప్రదేశ్ లో ఒకసారి ఇదే సమస్య వస్తే ముగ్గురు జడ్జ్ లతో ఏర్పాటైన కమిటీ ద్వారా నిర్ణయాలు తీసుకున్నారని కెసిఆర్ గుర్తు చేస్తూ, అవసరమైతే విద్యాసంవత్సరాన్ని పొడిగిస్తామని అన్నారు.  విద్యా సంవత్సరాన్ని రెండు సంవత్సరాలైనా చేస్తాం కానీ పొరపాటున కూడా ఒక్క విద్యార్థి ఫీజును కూడా ఎక్కువగా చెల్లించం అంటూ కరాఖండిగా చెప్పకపోయినా కెసిఆర్ తన ఉద్దేశ్యాన్ని స్పష్టం చేసారు.

-శ్రీజ