రాజకీయాలలో పాఠాలు నేర్చుకోవటాలుండవ్?

Posted: 07/17/2014 08:31 AM IST

Aravind kejriwal radio announcements on bjp

రాజకీయాలలో ఎంతవరకు లాగగలిగితే అంతవరకు లాగటమే కానీ అనుభవాల్లోంచి గుణపాఠాలు నేర్చుకోవటమనేది ఉండదని ఆమ్ ఆద్మీ పార్టీ కన్వీనర్ అరవింద్ కేజ్రీవాల్ రుజువుచేసారు.

ఆయనెలాగూ ఢిల్లీ పీఠాన్ని వదిలిపెట్టేసారు. రాష్ట్రపతి పాలన జరుగుతోంది. రాష్ట్రం నుంచి ఏకంగా జాతీయస్థాయిలోకి ఎదుగుదామనుకున్నారు కానీ అది కుదరలేదు. ఢిల్లీలాంటి పరిమిత పరిధిలో గడించిన గుడ్ విల్ దేశవ్యాప్తంగా ఆయన దక్కించుకోలేకపోయారు. మళ్ళీ ఢిల్లీలో అధికారం గురించి తపన పడుతూ మాట్లాడుతున్నారు. మళ్ళీ అంతలో ఏం మార్పు వచ్చిందంటే భారతీయ జనతా పార్టీ ఢిల్లీలో ప్రభుత్వాన్ని ఏర్పాటు చెయ్యటం కోసం పావులు కదుపుతోందన్న వార్త రెండు రోజులుగా ప్రచారంలో ఉంది.

నిజానికి ఢిల్లీలో భాజపాకే ఎక్కువ మెజారిటీ వచ్చినా, రెండవ స్థానంలో ఉన్న కేజ్రీవాల్ కాంగ్రెస్ పార్టీ మద్దతుతో ఢిల్లీ పీఠాన్ని అధిరోహించటమైతే చేసారు కానీ 49 రోజులలో దిగిపోయారు కూడా. ఆ తర్వాత ఢిల్లీలో రాష్ట్రపతిపాలన విధించటం జరిగింది. ఇప్పుడు మరోసారి భాజపా ఢిల్లీ లో అధికారాన్ని స్థాపిద్దామని చూస్తోందన్న విషయం కేజ్రీవాల్ ని కలవరపెట్టినట్టుగా కనిపిస్తోంది. ఆయన ఏకంగా రేడియోలో ప్రకటనలే ఇచ్చేస్తున్నారు భాజపా ఎమ్మెల్యేలను కొనటానికి ప్రయత్నం చేస్తోందని. అది కూడా 20 కోట్ల రూపాయలకు. దానితోపాటు ట్విట్టర్లో కూడా ఆరోపణలు కొనసాగిస్తున్నారు.

లోగడ భాజపాతో తలపడి జాతీయ ఎన్నికలలో ఓడిపోవటమే కాకుండా, భాజపా నాయకుల మీద అవినీతి ఆరోపణలను బహిరంగంగా చేసి పరువునష్టం దావాలను ఎదుర్కుని జైలు జీవితాన్ని కూడా చవిచూసారు. అయినా నిరాధారమైన అంటే, ఆయన నిరూపించలేని ఆరోపణలను మళ్ళీ మళ్ళీ చేస్తున్నారు. పోనీ తన పార్టీ ఎమ్మల్యేలను ప్రలోభపెట్టటానికి చూస్తే అది తనకు తెలిస్తే సాక్ష్యాధారాలున్నాయని అనుకోవచ్చు. భాజపా కాంగ్రెస్ పార్టీ ఎమ్మెల్యేలను కొనే ప్రయత్నం చేస్తున్నదంటూ కేజ్రీవాల్ రేడియోలో ప్రకటనల రూపంలోను, ట్విట్టర్లో వ్యాఖ్యలతోనూ సంచలనాన్ని సృష్టిస్తున్నారు.

నిండా మునిగిన తర్వాత చలేమిటన్నట్లు ఇప్పటికే పరువు నష్టం దావాలు నడుస్తున్నాయి కదా ఇంకా ఏమౌతుందిలే అన్న ధీమా కూడా కావొచ్చంటున్నారు రాజకీయ పరిశీలకులు.

-శ్రీజ