రైతుల బకాయిలు చెల్లించి అప్పుడు మాట్లాడండి!

Posted: 07/13/2014 02:39 PM IST

చక్కెర కర్మాగారం యాజమాన్యం మంత్రిగారిని కలుసుకోవటానికి వెళ్ళగా వాళ్ళు రైతులకు ముట్టవలసిన డబ్బు అందించకుండా బకాయిలు పెట్టటం పట్ల ఆగ్రహం వహించిన మంత్రి వాళ్ళను కలవటానికి సమయాన్నివ్వలేదు సరిగదా ముందు రైతులకు ఇవ్వాల్సిన బకాయిలను ఇవ్వండి ఆ తర్వాత రండి అని పంపించేసారు.

ఈ చేదు అనుభవం విజయనగరం జిల్లా సీతానగరం మండలం లచ్చయ్యపేట సమీపంలో ఉన్న ఎన్ సి ఎస్ సుగర్ ఫాక్టరీకి ఎదురైంది.  ఆ యాజమాన్యం కలుద్దామనుకున్నది రాష్ట్ర గ్రామీణాభివృద్ధి, గృహ నిర్మాణ శాఖ మంత్రి డా.కె.మృణాళినిని.  

రైతులకు 26 కోట్ల రూపయలు బకాయిపడి ఉన్న ఆ చక్కెర కర్మాగారం బకాయిలు చెల్లించేట్టుగా చూడమని మంత్రి మృణాళిని కొద్ది రోజుల క్రితం విజయనగరం జిల్లా కలెక్టర్ కి ఆదేశాలు జారీచేసారు.  కానీ యాజమాన్యం దాన్ని పెడచెవిన పెడుతూ మంత్రితో భేటీకి ప్రయత్నం చెయ్యటంతో ఆమె అందుకు నిరాకరించటమే కాకుండా ముందు ఆ బాకీలను చెల్లించి అప్పుడు ఏదైనా సమస్య మీద మాటలాడాలంటే రండి అని అన్నారు.

మంత్రిగా తాను ప్రభుత్వంలో ఉండి కూడా రైతులకు వాళ్ళకు రావలిసిన సొమ్మును సకాలంలో ఇప్పించలేకపోయినందుకు ఆమె బాధను వ్యక్తంచేసారు.  శ్రమకోర్చి పండించుకున్న పంటను ఇచ్చి కూడా సకాలంలో దాని సొమ్ము ఆ రైతులు పొందలేకపోవటం విచారకరమని మంత్రి అన్నారు.  

వెంటనే బకాయిలు చెల్లించండి, ఆ తర్వాతనే రండి అంటూ ఆ చక్కెర కర్మాగారం యజమాన్యాన్ని ఆదేశిస్తూ,  ఆ పని పూర్తయినతర్వాతనే వాళ్ళు ఎదుర్కుంటున్న సమస్యను పరిష్కరించుకోవటంలో తనను సంప్రదించటానికి రావలసిందిగా మృణాళిని గట్టిగా చెప్పారు.

-శ్రీజ