కాంగ్రెస్ పార్టీకి సిగ్గు లేదు! నాయుడు

Posted: 07/07/2014 11:15 AM IST

(Image source from: Central minister venkaiah naidu sensational comments on congress party)

ఇటీవలే జరిగిన సార్వత్రిక ఎన్నికల్లో కాంగ్రెస్ పార్టీ ఘోరంగా పరాజయం పాలయినా... ఆ పార్టీ మీద విమర్శలు చేయడం మానలేదు అదికారపార్టీలో వున్న కొంతమంది నాయకులు. ఇప్పుడు తాజాగా కేంద్ర పట్టణాభివృద్ధి మంత్రి వెంకయ్యనాయుడు... కాంగ్రెస్ పార్టీ మీద విరుచుకుపడ్డారు. కాంగ్రెస్ పార్టీ వల్లే దేశం ఆర్థికక్షోభలో మునిగిపోయిందని.. ఆ పార్టీ అధికారంలో వున్నప్పుడు ఎన్నో స్కాములు జరిగాయని.. కాంగ్రెస్ పార్టీ ఎన్నికల్లో పోటీ చేయడం చాలా దారుణమని తీవ్రంగా విమర్శించారు.

తెలంగాణ రాష్ట్ర కార్యాలయంలో ఆదివారంనాడు జరిగిన శ్యామ్ ప్రకాష్ ముఖర్జీ జయంతి సందర్భంగా బీజేపీ పార్టీ ఏర్పాటు చేసిన కార్యక్రమంలో వంకయ్యనాయుడు మాట్లాడుతూ కాంగ్రెస్ పార్టీ మీద కొన్ని తీవ్రమైన వ్యాఖ్యలు చేశారు. ‘‘యూపీఏ ప్రభుత్వం అధికారంలో వున్నప్పుడు దేశ ఆర్థిక వ్యవస్థకు చాలా దెబ్బపడింది. యూపీఏ తీసుకున్న నిర్ణయాల వల్లే దేశం వెనుకబడింది. ప్రస్తుతమున్న దేశ ప్రయోజనాలను దృష్టిలో పెట్టుకునే ఎన్టీయే ప్రభుత్వం కొన్ని కఠిన నిర్ణయాలు తీసుకుంది. అందులో భాగంగానే రైల్వే ఛార్జీలను, వంటగ్యాస్, కిరోసిన్ ధనలను పెంచాల్సి వచ్చింది’’ అని ఆయన స్పష్టం చేశారు.

అలాగే కాంగ్రెస్ పార్టీ మీద విమర్శలూ చేస్తూ... ‘‘ఇటీవలే జరిగిన సార్వత్రిక ఎన్నికల్లో ప్రజలు కాంగ్రెస్ పార్టీని ఘోరంగా ఓడించినప్పటికీ... ఆ పార్టీ సిగ్గులేకుండా ప్రతిపక్ష హోదా కోసం కోర్టుకు వెళ్తాం అనడం చాలా దారుణం’’ అని ఆయన మండిపడ్డారు. అలాగే ‘‘కాంగ్రెస్ పార్టీలో వున్న నాయకులు ఇన్నేళ్లు పదువులు అనుభవించి, ఇప్పుడు దక్కకపోవడం వల్ల అసహనంతో వున్నారని... వారి పరిస్థితి ఇప్పుడు ఒడ్డునపడ్డ చేపల్లా మారిపోయిందని’’ నాయుడు అవమానించారు.

‘‘బీజేపీ పార్టీ తీసుకున్న నిర్ణయాల మీద కాంగ్రెస్ పార్టీ నేతల వ్యతిరేకంగా ప్రచారం చేస్తున్నారు. అయితే వారు అమలు చేసిన తప్పుడు విధానాల వల్ల, వారి అవినీతి పాలనవల్ల ఈ విధంగా ధరలు పెంచాల్సి వచ్చింది’’ అని ఆయన పేర్కొన్నారు. దేశ ఆర్థిక వ్యవస్థను తిరిగి మెరుగుపరచడం కోసం భాజపా ఏమి చేయడానికైనా సిద్ధమేనని అని చెప్పిన ఆయన... ఆ పార్టీ ప్రజలకు ఇచ్చిన మాటలను నిలబెట్టుకుంటుందని, ప్రజలు కూడా తమను అర్థం చేసుకుని, నమ్ముతారనే భావన వ్యక్తం చేశారు.