తోకలేని పిట్టకు 90ఏళ్లు పట్టిందంటే ఇదేనేమో!

Posted: 07/04/2014 05:39 PM IST

(Image source from: American post office delivers a letters after 83 years)

ఎంత అభివృద్ధి చెందిన దేశాలయినా... ఎక్కడ ఒక చోట లోటు వుంటుందని చెప్పడానికి తాజాగా ఒక సమాచారం వెలుగులోకి వచ్చింది. ప్రపంచ లెక్కల ప్రకారం... గతంలో మన భారతదేశాన్ని అత్యంత వెనుకబడిన దేశంగా కొన్ని నివేదికలు వెల్లడించాయి. అయితే మనదేశం కంటే మరీ ఘోరంగా విదేశీయుల ప్రభుత్వాలు వున్నట్లు కనిపిస్తున్నాయి.

ఎప్పుడో 1931లో ఒక యువతి రాసిన ఉత్తరాన్ని 83 ఏళ్ల తరువాత బట్వాడా చేశారు. అమెరికాలో నివాసం వున్న మిరియమ్ మెక్ మైకేల్ అనే 23ఏళ్ల యువతి... 1931లో తన తల్లి డొలేనా మైక్ మైకేల్ కు తొమ్మిది పేజీలతో కూడిన ఒక సుదీర్ఘ ఉత్తరాన్ని రాసింది. (బహుశా అది చాలా ఇంపార్టెంట్ విషయం అయి వుండొచ్చు). అలా రాసుకున్న ఆ ఉత్తరాన్ని పోస్టు చేసిన ఆమె... తన తల్లి దగ్గరకు చేరుకుంటుందిలే అనే ధీమాతో పట్టించుకోలేదు.

కానీ కొన్ని ఏళ్లు గడిచిపోయాయి... తరాలు మారిపోయాయి... మనుషులు కూడా మారిపోయారు కానీ ఆ ఉత్తరం మాత్రం చేరాల్సిన చోటుకు చేరకుండా పోస్టాఫీసులోనే ఒక మూల పడివుంది. ఇటీవలే ఆ పోస్టాఫీసులో పనిచేసే మిచెల్లీ రోవెల్ అనే ఉద్యోగస్తునికి మూలపడిన ఈ ఉత్తరం కంటపడింది. దానిపై రెండుసెంట్ల విలువ చేసే స్టాంపు కూడా అంటించి వుంది. దానిని చూసి దీర్ఘంగా పరిశీలించగా... అది 83ఏళ్ల క్రితం రాసిన ఉత్తరం అని తేలింది. దాంతో అతను ఈ విషయం గురించి అతని ఉన్నతాధికారులకు ఫిర్యాదు చేశాడు.

పోస్టాఫీసు అధికారులు కూడా దీనిని క్షుణ్ణంగా పరిశీలించిన తరువాత అది 1931లో ఒక యువతి రాసిన ఉత్తరం అని తెలుసుకున్నారు. దాంతో వారు తమ నిర్వాకాన్ని తెలుసుకుని.. వెంటనే ఆ ఉత్తరం మీదున్న చిరునామా గురించి వెదుకులాట మొదలుపెట్టారు. పోస్ట్ మాస్టర్, ఇతర పట్టణాధికారులు ఎంతో కష్టమ్మీద ఆ కవర్ పై వున్న చిరునామాను వెతికి పట్టుకుని... అందులో నివాసమున్నవారికి అప్పగించి.. తమ నిర్వాక బాధ్యతని నిర్వర్తించారు.

అయితే ఇక్కడ విచారించుకోవాల్సిన విషయం ఏంటంటే... ఆ ఉత్తరం రాసిన వ్యక్తి, తీసుకోవాల్సిన వ్యక్తి ఇద్దరూ.. ఈ భూప్రపంచం మీద అడ్రస్ లేకుండా పోయారు (చనిపోయారు). ఈ ఉత్తరాన్ని ఇప్పుడు ఆ ఇంట్లో నివాసం వుంటున్న మిరియమ్ మేనకోడలు ఆన్ మైక్ మైకేల్ (69)కి పోస్టాఫీస్ అధికారులు అప్పగించారు.