రేప్ సంచలనంలో భార్య రంగప్రవేశం

Posted: 07/01/2014 01:50 PM IST

సిపిఎమ్ కార్యకర్తలను చంపేస్తాం వాళ్ళ భార్యలను మా కుర్రాళ్ళచేత రేప్ చేయిస్తామంటూ అనుచిత వ్యాఖ్యలు చేసిన పశ్చిమ బెంగాల్ అధికార పార్టీ తృణమూల్ కాంగ్రెస్ పార్టీ ఎంపీ తపస్ పాల్ భార్య రంగప్రవేశం చేసి తన భర్త అన్న మాటలకు క్షమాపణ కోరటం జరిగింది.  తన భర్త అలా మాట్లాడటం తప్పేనని ఆమె ప్రకటించారు.  ఇది చూస్తే ఒక సంఘటన గుర్తుకొస్తుంది.

చెన్నైలో జేబులు కత్తిరంచే మనిషి పట్టుబడి, పోలీసులు రాకముందే జనం చేత దెబ్బలు తింటున్నాడు.  ఇంతలో అతని భార్య గట్టిగా అరుచుకుంటూ వచ్చింది.  తన భర్తను కొట్టవద్దని కాదు ఇంకా కొట్టమని.  ఎన్ని సార్లు చెప్పినా తాగుడుకి అలవాటుపడి దొంగతనాలకు మరిగాడని, తనేమో పిల్లల్ని పోషించటానికి ఇళ్ళల్లో చాకిరి చేసుకుంటున్నానని, అలాంటి వాడిని క్షమించి వదిలిపెట్టద్దని, కొట్టటం కాదు చంపెయ్యండని అన్నదామె.  ఆమెతోపాటు ఆమె పిల్లలు కూడా బావురుమని ఏడుస్తున్న ఆ సన్నివేశం గుమికూడిన జనాలలో సానుభూతిని రేకెత్తించింది.  దొంగతనం చేసే మనిషిని కొట్టేవాళ్ళు కాస్తా ఆ కుటుంబానికి సాయంగా తలా కొంత డబ్బు ఇచ్చి వెళ్ళిపోయారు.  జేబులు కత్తిరిస్తే వచ్చేదానికంటే ఎక్కువే వచ్చాయి, పైగా ఆమె తన భర్తను దక్కించుకుంది.  ఎక్కువ దెబ్బలు తగిలితే తెల్లవారి బయటకు పోయి మళ్ళీ తన వృత్తిలో పని చెయ్యలేడుగా!

అయితే ఎంపీ హోదా పెద్దది కాబట్టి ఇక్కడ సన్నివేశంలోను, సంభాషణల్లోనూ తేడా ఉంటుందనుకోండి.  కానీ సంచలన వ్యాఖ్యలకు వచ్చిన గాలిదుమారాన్ని ఎలాగో ఒకలా అడ్డుకోవాలి కదా!

-శ్రీజ