ఆంధ్రప్రదేశ్ కి ఎయిమ్స్ తరహా హాస్పిటల్!

Posted: 06/26/2014 03:05 PM IST

ఆల్ ఇండియా ఇన్స్ స్టిట్యూట్ ఆఫ్ మెడికల్ సైన్సెస్ (AIIMS) వైద్యరంగంలో పరిశోధనతో పాటు ఎన్నో విధాలుగా వైద్య సేవలందించిన ప్రభుత్వ సంస్థగా ఎంతో పేరుగడించింది.  మనదేశంలో ఇప్పటికి మొత్తం 7 ప్రదేశాలలో ఎయిమ్స్ హాస్పిటల్స్ ఉన్నాయి.  

1956 లో ఢిల్లీలో స్థాపించిన ఎయిమ్స్ కి సమాంతరంగా 2012 లో మరో 6 ప్రదేశాలలో భోపాల్, భువనేశ్వర్, జోధ్ పూర్, పాట్నా, రాయపూర్, ఋషికేశ్ లలో ఎయిమ్స్ కేంద్రాలు నెలకొల్పబడ్డాయి.  అవన్నీ ఢిల్లీ, మధ్యప్రదేశ్, ఒడిశా, రాజస్థాన్, బీహార్, ఛత్తీస్ గఢ్ ఉత్తరాఖండ్ రాష్ట్రాలలో ఉన్నాయి. 

ఇప్పుడు మొదటిసారిగా దక్షిణభారతంలో విజయవాడ, గుంటూరు మధ్య 1200 కోట్ల వ్యయంతో ఎయిమ్స్ కేంద్రాన్ని ప్రారంభించటానికి సన్నాహాలు జరుగుతున్నాయని రాష్ట్ర వైద్య ఆరోగ్య శాఖా మాత్యులు కె శ్రీనివాసరావు తెలియజేసారు.  ఇందుకోసం 200 ఎకరాల భూమిని సేకరించటానికి ప్రయత్నాలు జరుగుతున్నాయని, పరిశీలనకు వారం రోజుల్లో ఢిల్లీ నుంచి కేంద్ర బృందం రాబోతున్నదని శ్రీనివాసరావు అన్నారు.

-శ్రీజ