రాష్ట్రాల మధ్య జటిలమౌతున్న నీటి సమస్య

Posted: 06/25/2014 03:31 PM IST

కృష్ణా జిల్లా డెల్టాకి త్రాగు నీటికోసం 10 టిఎమ్ సి ల నీటిని తెలంగాణా రాష్ట్ర విడుదల చెయ్యటానికి ముందుగానే నిర్ణయం తీసుకోవటం జరిగినా, ఆ విషయంలో అమలుకు ఏ నిర్ణయం తీసుకోకుండా పెండింగ్ లో పెట్టిన తెలంగాణా ముఖ్యమంత్రి కెసిఆర్ వైఖరికి ఆంధ్రప్రదేశ్ లో నిరసనలు మొదలయ్యాయి.  

ఈ తగవును తీర్చటానికి వచ్చిన కేంద్ర జలసంఘం ఛైర్మన్ కి కూడా చేదు అనుభవం ఎదురైంది.  ఇరు రాష్ట్రాల ప్రధాన కార్యదర్శులతో సమావేశానికి సిద్ధమైన ఛైర్మని పాండ్యా పిలుపుకు తెలంగాణా రాష్ట్ర ప్రధాన కార్యదర్శి హాజరవలేదు కానీ తెలంగాణా ఇంజినీర్ ఇన్ ఛీఫ్ మురళీధర్ సమావేశంలో చర్చల్లో పాల్గొన్నారు.  తీరా చర్చల అనంతరం 10 కి బదులు ముందుగా 3.6 టిఎమ్ సి ల నీటిని వదలాలని ఒక నిర్ణయం తీసుకున్న తర్వాత తెలంగాణా నీటిపారుదల ముఖ్య కార్యదర్శి అరవింద రెడ్డి అనంగీకారం ప్రదర్శిస్తూ, ఈ విషయంలో ప్రభుత్వంతో చర్చించాలని అని వెళ్ళిపోయారు.  

ఆ విధంగా తగవు తీర్చటానికి వచ్చిన మధ్యవర్తి మాట కూడా విననప్పుడు చర్చల వలన లాభమేమిటని, నిర్ణయం తీసుకోలేనివాళ్ళు చర్చలోకి రావటమెందుకని ఆంధ్ర ప్రదేశ్ నాయకులంటున్నారు.

తెలంగాణా నాయకులు నీటిని వదిలే విషయంలో ప్రకటించిన అనుమానమేమిటంటే, ఈ నీరు త్రాగటానికి కాదని, కేవలం సాగు చేసుకోవటానికే ఆంధ్రా రైతులు ఉపయోగిస్తారని, అవి కాస్తా అయిపోగానే మరోసారి నీరు కావాలని అడుగుతారని.  కాదు, మాకు తాగు నీటికోసమే అడుగుతున్నాం అన్నా సందేహం పోవటం లేదు.  

రాష్ట్ర విభజన వలన ముందుగా వచ్చేది జల సమస్యే నని మాజీ ముఖ్యమంత్రి కిరణ్ కుమార్ రెడ్డి పవర్ పాయింట్ ప్రెజెంటేషన్ ద్వారా మీడియా ప్రతినిధులకు చేసిన వివరణ ఈ సమయంలో ఎవరికైనా గుర్తుకు రాక మానదు.

-శ్రీజ