నూజువీడు - ఖమ్మం మధ్య అంతర్జాతీయ విమానాశ్రయం

Posted: 06/17/2014 07:48 PM IST

(Image source from: chandrababu planning to make an airport between nuziveedu and khammam districts)

ఆంధ్రప్రదేశ్ రాష్ట్ర ముఖ్యమంత్రిగా పగ్గాలు చేపట్టిన నారా చంద్రబాబు నాయుడు... రాష్ట్ర అభివృద్ధి కోసం మొదటిరోజు నుంచే సన్నాహాలు చేపట్టారు. ఆంధ్ర రాష్ట్రంలో హైదరాబాద్ సిటీని మించేలా ఆరు సిటీలను నిర్మిస్తానని హామీ కూడా ఇచ్చారు. ప్రమాణ స్వీకారం రోజే తాను ఒక కూలీ పనివాడిలాగా రాష్ట్ర అభివృద్ధి కోసం అహర్నిశలు శ్రమిస్తానని కూడా అందరిముందు వాగ్ధానం కూడా చేశారు. ఆరోజే అందరి సమక్షంలో వివిధ రకాల పథకాల మీద ఐదు సంతకాలను చేశారు. రైతులకు రుణమాఫీ, 2 రూపాయలకే 20 లీటర్ల నీరు ప్రతి గ్రామానికి చేరేవిధంగా సుజల పథకం, పదవీ విరమణ 60 సంవత్సరాలవరకు పెంపు, వికలాంగులకు - వృద్ధులు 1000 రూపాయల వరకు ఫింఛన్ల పెంపు, బెల్టు షాపుల రద్దు వంటి దస్త్రాలపై సంతకాలు చేసి... మొదటిరోజు నుంచే సీఎంగా తన బాధ్యతలను నిర్వర్తించారు.

తాజాగా రాష్ట్ర రాజధాని నిర్మాణం కోసం అనేక రకాల కార్యకలాపాలను కూడా సిద్ధం చేసుకున్నారు. ఈ విషయమై శివరామకృష్ణన్ కమిటీ వారితో తరచూ సమావేశాలను నిర్వహిస్తున్నారు. ఈ విషయమై శివరామకృష్ణన్ కమిటీవారు ఒక రాష్ట్ర రాజధానిని నిర్మించడం అసాధ్యం అని చంద్రబాబుకు నోటీసు పంపితే... వారికి బదులుగా ఆయన హార్డ్ వర్క్ అనేది తన రక్తంలో వుందని పేర్కొన్నారు. అంతేకాకుండా ప్రపంచస్థాయిలోనే పేరుగాంచే విధంగా ఒక రాజధానిని సృస్టిస్తానని కూడా విశ్వాసం వ్యక్తం చేశారు.

ప్రస్తుతం చంద్రబాబు ఆంధ్రరాష్ట్ర రాజధాని అభివృద్ధిలో ఒక అడుగు ముందుకేసినట్టు కనిపిస్తోంది. శివరామకృష్ణన్ కమిటీ వారితో సమావేశమైన తరువాత ఆంధ్రప్రదేశ్ నగరానికి సంబంధించిన ఒక కీలకమైన నిర్ణయాన్ని తీసుకున్నారు. సీమాంధ్రలో ఒక అంతర్జాతీయ విమానాశ్రయాన్ని నిర్మించాలని, కమిటీవారితో కలిసి నిర్ణయం తీసుకున్నట్టుగా తెలుస్తోంది.

తెలుగుదేశం పార్టీ అధినాయకుడు, ఆంధ్రప్రదేశ్ రాష్ట్ర ముఖ్యమంత్రి అయిన నారాచంద్రబాబు నాయుడు నూజివీడు (కృష్ణా జిల్లా) - ఖమ్మం ప్రాంతాల మద్య అంతర్జాతీయ విమానాశ్రయానికి కావలసిన అన్ని ఏర్పాట్లను సిద్ధం చేయాల్సిందిన సంబంధిత అధికారులను ఆదేశించారు. అదే విధంగా ఆ ప్రదేశంలో విద్యాసంస్థలు, ఆస్పత్రులు, సాఫ్ట్ వేర్ వంటి ప్రైవేటు రంగాల ఏర్పాటు చేయాలనే వారికి దావా ఇచ్చినట్లు తెలుస్తోంది. అలాగే ఆంధ్రప్రదేశ్ రాష్ట్ర రాజధాని నిర్మాణానికి అవసరమైన ప్రాంతాన్ని కూడా తొందరలోనే ప్రకటిస్తానని చంద్రబాబు పేర్కొన్నారు.