మిగిలేది ఆరడుగులే! - PAWAN

Posted: 05/03/2014 08:46 AM IST

ఎన్నికల ప్రచారంలో భాగంగా ఉభయగోదావరి జిల్లాల్లోని నరసాపురం, తణుకు, కాకినాడ, రాజమండ్రిలలో జరిగిన బహిరంగ సభల్లో పవన్ కల్యాణ్ పాల్గొన్నారు. హైదరాబాద్ చుట్టూ జగన్, ఆయన అనుచరులు చేసిన భూ కబ్జాల వల్లే తెలంగాణ ప్రజలు తిరగబడ్డారని చెప్పారు.

వైఎస్ భూ దాహానికి విలువైన వేలాది ఎకరాల పంట భూములు స్వాహా అయ్యాయని విమర్శించే సందర్భంలో.. ఆయన మృతిని పరోక్షంగా గుర్తుకు తెస్తూ.. ఓ కథని పవన్ ఆసక్తికరంగా చెప్పారు. "సోవియట్ సాహిత్యంలో నేను ఒక కథ చదివాను. జార్ చక్రవర్తి వద్దకు ఓ వ్యక్తి వెళ్లి పంటలు పండించుకునేందుకు భూమి కావాలని అడుగుతాడు. ఎంత భూమిని చూపించినా 'సరిపోదు' అంటాడు. దీంతో ఆ చక్రవర్తి 'సూర్యోదయం నుంచి సూర్యాస్తమయంలోగా నువ్వు ఎంత దూరమైతే పరుగెడతావో, అంత భూమిని నీకు ఇస్తాన'ని చెబుతాడు. ఆ వ్యక్తి అత్యాశతో వేగంగా సూర్యాస్తమయం వరకూ పరుగులు తీసి అలసిపోతాడు. మరో పదడుగులు వెళితే ఆ భూమి కూడా వస్తుందనే అత్యాశతో ముందుకు వెళ్లి కుప్పకూలి చనిపోతాడు. చివరకు ఆ మనిషికి ఆరడుగుల భూమే గతయింది. అదే మాదిరి భూకబ్జాలకు పాల్పడినా.. దోపిడీలకు పాల్పడినా.. ఎవరికైనా సరే ఆ ఆరడుగులే మిగుతుంది'' అని వివరించారు.

దివంగత నేత వైఎస్ దుర్మార్గాలు, వైసీపీ నేత జగన్ దోపిడీ వల్లనే రాష్ట్రంలో వైషమ్యాలు పెరిగాయని ఆయన ధ్వజమెత్తారు. సీఎం పదవి కోసం జగన్ తన తల్లిని కష్టపెట్టి ఎండలో తిప్పుతున్నారని, వైఎస్ బతికుండగా సుఖంగా ఉన్న ఆమె ఇపుడు రోడ్లపై తిరుగుతున్నారని వ్యాఖ్యానించారు. సీమాంధ్ర పౌరుషాన్ని కాపాడలేనివాడు, లక్షల కోట్ల ప్రజాధనాన్ని దోపిడీ చేసి, జైలుకు వెళ్లిన వాడు సీఎం కాలేడని తేల్చిచెప్పారు.

వైసీపీ హటావో సీమాంధ్ర బచావో అని పవన్ నినదించినప్పుడు అభిమానుల నినాదంతో స్టేడియం మారుమోగిపోయింది. "నాక్కొంచెం తిక్క ఉంది దానికో లెక్క ఉంది అందుకే నేను ఇక్కడ ఉన్నా'' అని పవన్ అనగానే అభిమానులు హర్షాతిరేకాలు వ్యక్తం చేశారు. కాగా గోదావరి జిల్లాల్లో జరిగిన పవన్ సభలకు జనం పోటెత్తారు. రాజమండ్రిలోని స్టేడియం నిండిపోయి జనాలు రోడ్లపై ఉండిపోవడంతో ట్రాఫిక్ భారీగా జాం అయింది. నరసాపురం, తణుకు కాకినాడ ల్లో జరిగిన సభల్లోకూడా భారీగా జనం తరలివచ్చారు.