ఆఆపా టివి ఛానెల్

Posted: 04/26/2014 02:10 PM IST

ఆమ్ ఆద్మీ పార్టీకి దేశంలో విదేశాలలోనూ మద్దతు బాగా ఉంది.  ఏ కార్యక్రమం మొదలుపెట్టినా ఆ పార్టీకి చందాలు వచ్చి పడుతున్నాయి.  ఢిల్లీ పదవీ త్యాగం చేసి జాతీయ రాజకీయాల మీద దృష్టి పెట్టిన ఆఆపా తమకున్న బలాన్ని ఇంకా పెంచుకోవటం కోసం తమ సొంత టివి ఛానెల్ పెట్టుకుంటే ఎలా ఉంటుందన్న విషయంలో ఒక నిర్ణయానికి అప్పుడే రానేవచ్చింది.  ఇక జరగవలసింది కార్యాచరణే. 

ప్రస్తుతమున్న మీడియా తమ పార్టీని ఎక్కువగా కవర్ చెయ్యటం లేదన్న అభిప్రాయం కలగటం వలన ప్రజలకు, ముఖ్యంగా విదేశాలలో ఉన్న భారతీయులకు దగ్గరవాలనే ఉద్దేశ్యంతోనే 24 గంటల యూట్యూబ్ ఛానెల్ తో సొంత మీడియా అనే ఆలోచనకు కార్యరూపమివ్వనుంది. 

ఇందులో ప్రచార వీడియోలు, ప్రసంగాలు, పార్టీ నేతలతో ఇంటర్వ్యూలను అప్ లోడ్ చెయ్యదలచుకున్నారు.  ఆప్ మీద సదభిప్రాయమున్న ప్రవాస భారతీయులు ఆఆపా కన్వీనర్ అరవింద్ కేజ్రీవాల్ ప్రసంగాలకు బాగా స్పందించినట్లుగా తెలియరావటంతో వారికి మరింతగా చేరువవటం కోసం ఆప్ టివి ఛానెల్ బాగా ఉపకరిస్తుందని ఆఆపా పార్టీ వర్గాలు ఆశిస్తున్నాయి.

-శ్రీజ