షిండే ఆపరేషన్ సీక్రెట్..?

Posted: 10/18/2013 08:34 PM IST

సమైక్యాంద్ర ఉద్యమం చల్లబడిపోవటంతో.. రాష్ట్ర విభజనపై కేంద్రం దూకుడు పెంచింది. రాష్ట్ర విభజనకు సంబంధించి కేంద్రం సైలెంట్ ఆపరేషన్ నిర్వహిస్తోంది. తెలంగాణ జిల్లాల వివరాలను యుద్ధప్రాతిపదికన తయారు చేసి రిపోర్ట్ ఇవ్వాలని కేంద్ర హోంశాఖ ఉన్నతాధికారులు, రాష్ట్రంలోని అధికార యంత్రాంగాన్ని ఆదేశించారు. ఈ మేరకు కేంద్రం 13 అంశాలను ఒక ఫార్మాట్‌ రూపంలో వచ్చేలా విషయాలను సేకరిస్తోంది. అయితే ఇది అత్యంత గోప్యంగా, కేవలం టెలిఫోన్ ద్వారా మాత్రమే సేకరిస్తూ సైలెంట్ ఆపరేషన్ నిర్వహిస్తోంది. గుట్టుచప్పుడు కాకుండా వివరాలను సేకరిస్తోంది.

 

రాష్ట్ర విభజనకు సంబంధించి అధికారికంగా ఎలాంటి సమాచారం ఇవ్వకుండానే క్షేత్రస్థాయి వివరాల సేకరణలో పడింది. రాష్ట్రంలో ఆర్టికల్ 371 క్లాజ్ D అమలుకు సంబంధించిన సమాచారంపై ఆరా తీసింది. వారం రోజుల క్రితమే రాష్ట్ర అధికారులను కేంద్రహోంశాఖ కోరినట్లు తెలుస్తోంది. ముఖ్యంగా జనాభా, పరిశ్రమలు, నదులు, ప్రాజెక్టులు, విద్యుత్ ఉత్పత్తి, వినియోగం, సాగువిస్తీర్ణం, ఉద్యోగుల ఆదాయం, ప్రభుత్వ భూములు, అటవీ భూములు వంటి అంశాలు ఈ ఫార్మాట్లలో ఉన్నట్లు తెలుస్తోంది.

 

దీంతో రాష్ట్ర అధికారులు ఆ వివరాల సేకరణ పనిలో బిజీ అయ్యారు. మరోవైపు కేంద్ర హోంశాఖ ఇప్పటివరకు ఎలాంటి రాతపూర్వక ఆదేశాలు జారీ చేయలేదు. అంతేకాకుండా రాష్ట్రవిభజనపై ఏర్పాటు చేసిన మంత్రుల బృందానికి కూడా ఈ విషయం తెలియదు. రాష్ట్ర ప్రభుత్వానికి ఇంత వరకూ అధికారికంగా సమాచారం అందలేదు. హోంశాఖ ఉన్నతాధికారులు మాత్రమే సైలెంట్ ఆపరేషన్ చేస్తున్నట్లు కనిపిస్తోంది.

 

తమకు కావాల్సిన సమాచారాన్ని ఫోన్‌లో చెబుతున్నారు. ఆ మేరకు అధికార యంత్రాంగం నుంచి సమాచారాన్ని సేకరిస్తున్నారు. ఇక రాష్ట్రవిభజన ప్రక్రియను హోంశాఖ తన కన్నుసన్నల్లోనే నడిపిస్తోంది. సాధ్యమైనంతగా వివరాలను గోప్యంగా ఉంచుతోంది. భవిష్యత్‌లో న్యాయపరమైన వివాదాలు తలెత్తకుండా అన్ని అంశాలపై దృష్టిపెడుతోంది.