షిండే హెచ్చరిక-లాయర్ సవాల్

Posted: 09/13/2013 05:58 PM IST

నిర్భయ కేసులో దోషులకు ఉరిశిక్ష విధిస్తూ సాకేత్ కోర్టు ఇచ్చిన తీర్పుపై కేంద్ర హోంమంత్రి సుశీలకుమార్ షిండే స్పందించారు. క్రూర నేరస్థులకు ఈ తీర్పు ఓ హెచ్చరిక అని ఆయన తెలిపారు. అత్యంత అరుదైన కేసులో ఉరిశిక్ష తప్పదన్నారు. న్యాయ వ్యవస్థపై రాజకీయ ఒత్తిడి అసాధ్యమని చెప్పారు.  ప్రతి పోలీస్‌స్టేషన్‌లో మహిళా పోలీసులు ఉండేలా చర్యలు తీసుకోనున్నట్లు వెల్లడించారు. నిర్భయ కేసులో దోషులు అత్యంత అమానుషంగా ప్రవర్తించారని, ఇలాంటి క్రూరులను భయపెట్టేందుకే ఈ తీర్పు అని ఆయన తెలిపారు. వెంటబడి మహిళలను వేధిస్తే చట్టంలో శిక్ష ఉందని, ఇలాంటి కేసుల్లో పోలీసులు నిర్లక్ష్యానికి కూడా శిక్ష ఉందని షిండే పేర్కొన్నారు.

 

పక్షపాతంతో కూడిన తీర్పు

ఢిల్లీ గ్యాంగ్ రేప్ కేసులో తీర్పు పూర్తి పక్షపాతంతో కూడుకున్నదని డిఫెన్స్ లాయర్ ఏపీ సింగ్ ఆరోపించారు. తీర్పు అనంతరం ఆయన మాట్లాడుతూ నిర్భయ ఘటన తర్వాత ఢిల్లీలో ఒక్క రేప్ కూడా జరగలేదనా అని ప్రశ్నించారు. ఆ కేసుల్లో లేని ఉత్సాహం ఇందులో ఎందుకన్నారు. తీర్పుపై రాజకీయ ఒత్తిళ్ల్లు ఉన్నాయని మండిపడ్డారు. హైకోర్టులో అప్పీలుకు తమకు మూడు నెలల సమయం ఉందని, ఈ మూడు నెలల్లో ఒక్క రేప్ కూడా జరుగకపోతే అప్పీల్‌కు వెళ్లని డిఫెన్స్ లాయర్ ఏపీసింగ్ సవాల్ చేశారు.